Shivendrasinhraje Bhosale – राज्याच्या सार्वजनिक बांधकाम विभागाकडील दीर्घकाळ प्रलंबित असलेल्या कामांचे स्वतंत्र परीक्षण करावे. ‘विकसित महाराष्ट्र 2047’च्या अनुषंगाने पुढील 20 वर्षांचा विकास आराखडा तयार करा आणि प्रलंबित असलेली कामे तातडीने पूर्ण करा, अशा सूचना सार्वजनिक बांधकाम मंत्री शिवेंद्रसिंहराजे भोसले यांनी अधिकार्‍यांना दिल्या. पावसाळी अधिवेशनाच्या पार्श्वभूमीवर सार्वजनिक बांधकाम विभागाकडील प्रलंबित कामे, अर्थसंकल्पीय तरतुदी,

विभागीय दायित्व, सेवा प्रवेश नियम आणि कुंभमेळ्यासाठी नाशिक येथे सुरू असलेल्या कामांचा आढावा मंत्री शिवेंद्रसिंहराजे भोसले यांनी मुंबई येथे मंत्रालयातील बैठकीत घेतला. बैठकीस अप्पर मुख्य सचिव मिलिंद म्हैसकर, सचिव (रस्ते) शरद राजभोज, मुख्य अभियंता प्रज्ञा वाळके, उपसचिव शैलेश बोरसे, उपसचिव निरंजन तेलंग आणि वरिष्ठ अधिकारी उपस्थित होते. रस्ते, पूल, शासकीय इमारती, कुंभमेळ्याची कामे, विभागामार्फत विविध लेखाशीर्षांतर्गत सुरू असलेली कामे,

त्यांची उर्वरित किंमत, चालू आर्थिक वर्षातील अर्थसंकल्पीय तरतुदी, क्षतिग्रस्त पूल आणि रस्त्यांची दुरुस्ती, अतिवृष्टीमुळे बाधित पायाभूत सुविधांची पुनर्बांधणी, भूसंपादनासाठी आवश्यक निधी आदी कामांचा आढावा या बैठकीत घेण्यात आला. सार्वजनिक बांधकाम विभाग आणि महाराष्ट्र राज्य पायाभूत सुविधा विकास महामंडळामार्फत सुरू असलेल्या आणि प्रस्तावित रस्ते व पुलांची अद्ययावत माहिती उपलब्ध रहावी यासाठी सांख्यिकी माहिती प्रणाली विकसित करण्याचे निर्देश ना. शिवेंद्रसिंहराजे यांनी दिले.

रस्त्यालगत प्रसाधनगृहे आणि जनसुविधा केंद्र उभारणीच्या नव्या धोरणाचाही आढावा घेण्यात आला. राष्ट्रीय महामार्ग आणि सार्वजनिक बांधकाम विभागाच्या प्रमुख मार्गांवर उपलब्ध अतिरिक्त जागेमध्ये सुरक्षा विषयक निकषांचे पालन करून जनसुविधा केंद्रे उभारण्यात यावीत, असे त्यांनी सांगितले. नाशिक येथील कुंभमेळ्यासाठी हाती घेण्यात आलेली पहिल्या टप्प्यातील 18 आणि दुसर्‍या टप्प्यातील 16 पॅकेजेसची कामे प्रगतिपथावर असल्याची माहिती बैठकीत देण्यात आली. कामांच्या गुणवत्तेवर देखरेख ठेवण्यासाठी मुंबई आयआयटी, प्राधिकरण अभियंता,

विभागीय गुणवत्ता नियंत्रण यंत्रणा आणि कुंभ प्राधिकरणाच्या सल्लागारांची नियुक्ती करण्यात आल्याचे नमूद करण्यात आले. नाशिक येथील पाहणीत निदर्शनास आलेल्या बाबींचा आढावा घेताना, कुंभमेळ्याच्या कामांमध्ये गुणवत्ता, पारदर्शकता आणि वेळेचे पालन करण्याच्या सूचना ना. शिवेंद्रसिंहराजे यांनी दिल्या. मजूर संस्थांना देण्यात येणारी कामे, रोप वेसाठी नवीन लेखाशीर्ष, लवाद व भूसंपादन धोरण, राज्य शासनाकडे हस्तांतरित करण्यात आलेली एअर इंडियाची इमारत आणि विभागामध्ये कृत्रिम बुद्धिमत्ता तंत्रज्ञानाचा प्रभावी वापर यासंदर्भात सादरीकरण करण्यात आले.