Shirur Gun Firing – मांडवगण फराटा (ता. शिरूर) येथे आयोजित भैरवनाथ क्रिकेट स्पर्धेदरम्यान क्षुल्लक कारणावरून सुरू झालेला वाद थेट गोळीबारापर्यंत पोहोचल्याची धक्कादायक घटना घडली आहे. बॅनरवर फोटो न लावल्याच्या कारणावरून निर्माण झालेल्या वादातून जिवे मारण्याच्या उद्देशाने गोळीबार करण्यात आल्याचा आरोप असून, या घटनेमुळे संपूर्ण परिसरात भीतीचे वातावरण निर्माण झाले आहे. याप्रकरणी शिरूर पोलीस ठाण्यात विविध कलमान्वये गुन्हा दाखल करण्यात आला आहे. मिळालेल्या माहितीनुसार, फिर्यादी मिथुन उर्फ अमोल आनंदा चौगुले (वय ३१, रा. मांडवगण फराटा) यांनी यासंदर्भात तक्रार दिली आहे. १९ मार्च रोजी सायंकाळी ७ वाजेच्या सुमारास गावातील भैरवनाथ क्रिकेट ग्राउंडवर ही घटना घडली. स्पर्धेच्या बॅनरवर आरोपी सूत्रधार शिंदे याचा फोटो न लावल्याच्या कारणावरून आधीपासून वाद सुरू होता. हा वाद मिटवण्यासाठी मध्यस्थी म्हणून फिर्यादीला बोलावण्यात आले होते. मात्र, तेथे उपस्थित असलेल्या अक्षय पाटील आणि पप्पू कड यांनी पुन्हा वाद घालत परिस्थिती चिघळवली. यावेळी आरोपी पप्पू कड याने आपल्याकडील पिस्तुलातून फिर्यादीच्या दिशेने गोळीबार केला. सुदैवाने या हल्ल्यात कोणतीही जीवितहानी झाली नाही, मात्र मैदानावर मोठी धावपळ उडाली. फिर्यादी जीव वाचवण्यासाठी पळत असताना सूत्रधार शिंदे, ऋतिक चव्हाण, योगेश मचाले, दिगंबर शेंडकर आणि इतर ४ ते ५ अनोळखी इसमांनी त्यांच्यावर दगडफेक करून शिवीगाळ केली. या प्रकरणी आर्म ॲक्ट आणि मुंबई पोलीस अधिनियमांतर्गत गुन्हा नोंदवण्यात आला असून, पोलीस उपनिरीक्षक शुभम चव्हाण पुढील तपास करत आहेत.
