Shirur Crime – शिरूर तालुक्यातील ढोक सांगवी येथे पीसीपीएनडीटी कायद्याचे सर्रास उल्लंघन करून मोबाईल अॅपच्या सहाय्याने बेकायदेशीर गर्भलिंग निदान करणाऱ्या एका मोठ्या रॅकेटचा आरोग्य विभाग आणि गुन्हे शाखेच्या संयुक्त पथकाने पर्दाफाश केला आहे. ढोक सांगवी परिसरातील ‘लाईफ केअर हॉस्पिटल’वर छापा टाकून ही धडक कारवाई करण्यात आली. याप्रकरणी बीएएमएस शिक्षण घेतलेला डॉ. आकाश सुभाष मलगुंडे आणि त्याच्याशी संबंधित एजंटवर गुन्हा दाखल करण्यात आला असून, मोबाइल तंत्रज्ञानाचा वापर करून चालणारा हा प्रकार उघडकीस आल्याने आरोग्य क्षेत्रात खळबळ उडाली आहे. आरोग्य विभागाला मिळालेल्या गोपनीय माहितीनुसार, या रॅकेटचा पर्दाफाश करण्यासाठी पोलिसांनी विशेष सापळा रचला होता. वाघोली पोलीस ठाण्यातील एका महिला पोलीस कॉन्स्टेबलने बनावट रुग्ण म्हणून हॉस्पिटलमध्ये प्रवेश केला. बेकायदेशीर तपासणीची खात्री पटताच पथकाने छापा टाकला. या तपासणीदरम्यान क्लिनिकमध्ये गर्भपातासाठी वापरली जाणारी बेकायदेशीर औषधे, पीसीपीएनडीटी कायद्याचे उल्लंघन करणारी कागदपत्रे आणि अन्य संशयास्पद साहित्य आढळून आले असून ते जप्त करण्यात आले आहे. पोलिसांनी तातडीने संबंधित क्लिनिक सील करण्याची कारवाई केली आहे. ही कारवाई आरोग्य सेवा पुणे मंडळाचे उपसंचालक डॉ. भगवान पवार यांच्या मार्गदर्शनाखाली, जिल्हा शल्यचिकित्सक डॉ. नागनाथ येमपल्ले, शिरूर ग्रामीण रुग्णालयाचे वैद्यकीय अधीक्षक डॉ. सचिन घर यांच्या उपस्थितीत पार पडली. क्राइम ब्रँच युनिट-७ चे डीसीपी राजेंद्र मुळीक व वरिष्ठ पोलीस निरीक्षक संतोष सोनवणे यांच्या पथकाने आरोपींना ताब्यात घेतले. गर्भलिंग निदान करणे हा गंभीर गुन्हा असून अशा कृत्यात सहभागी असणाऱ्यांना कोणतीही सूट दिली जाणार नाही, असा इशारा प्रशासनाने दिला आहे. नागरिकांनी अशा बेकायदेशीर प्रकारांची माहिती तात्काळ पोलीस किंवा आरोग्य विभागाला देण्याचे आवाहन करण्यात आले आहे.
