Jambut News : शिरूर तालुक्यातील बेट भागात पुन्हा एकदा अवैध धंद्यांचे प्रमाण वाढल्याची चर्चा सुरू असून, यामुळे परिसरातील नागरिकांमध्ये चिंता व्यक्त केली जात आहे. गावठी दारू, बेकायदेशीर मद्यविक्री, मटका आणि जुगार अड्ड्यांमुळे सामाजिक तसेच कायदा-सुव्यवस्थेचे प्रश्न निर्माण होण्याची शक्यता व्यक्त केली जात आहे. त्यामुळे शिरूरचे नवनियुक्त पोलीस निरीक्षक विनोद पाटील आणि टाकळी हाजी पोलीस दुरक्षेत्राची भूमिका महत्त्वाची ठरणार आहे. (Jambut News)

स्थानिकांच्या म्हणण्यानुसार, बेट भागातील अनेक धाबे, हॉटेल्स आणि पानटपऱ्यांवर सर्रासपणे मद्यविक्री सुरू असल्याचे दिसून येत आहे. विशेष म्हणजे या प्रकारांमुळे तरुण आणि अल्पवयीन मुलांवर विपरीत परिणाम होत असल्याची खंत नागरिक व्यक्त करत आहेत. यामुळे अनेक कुटुंबांचे संसार उद्ध्वस्त होत असून सामाजिक समस्या वाढत असल्याचेही बोलले जात आहे. (Jambut News)

यापूर्वी पोलीस प्रशासनाने गावठी दारू, ताडी आणि इतर अवैध धंद्यांवर अनेक कारवाया केल्या होत्या. काही ठिकाणी अड्डे उद्ध्वस्त करण्यात आले होते. मात्र कारवाईनंतर काही काळ परिस्थिती नियंत्रणात राहते आणि त्यानंतर पुन्हा हे धंदे सुरू होत असल्याची चर्चा परिसरात आहे. (Jambut News)

बेट भागाच्या पश्चिम पट्ट्यात मटका आणि जुगाराचे अड्डे सुरू असल्याच्या तक्रारीही समोर येत आहेत. दिवसाढवळ्या सुरू असलेल्या या प्रकारांमुळे गुन्हेगारीला खतपाणी मिळत असल्याची भावना नागरिकांमध्ये आहे. त्यामुळे अवैध धंद्यांवर प्रभावी आणि सातत्यपूर्ण कारवाईची मागणी स्थानिकांकडून केली जात आहे. (Jambut News)

दरम्यान, पंचतळे परिसराला यापूर्वी गुन्हेगारीच्या पार्श्वभूमीवर ‘हॉटस्पॉट’ म्हणून घोषित करण्यात आले होते. या भागात याआधी दरोडे, खून आणि इतर गंभीर गुन्ह्यांच्या घटना घडल्या आहेत. त्यामुळे पुन्हा गुन्हेगारीला चालना मिळू नये यासाठी पोलिसांनी अधिक सतर्क राहण्याची गरज व्यक्त होत आहे. (Jambut News)

टाकळी हाजी पोलीस दुरक्षेत्र आणि शिरूर पोलीस ठाण्याकडून आगामी काळात अवैध धंद्यांविरोधात कोणती पावले उचलली जातात, याकडे परिसरातील नागरिक, महिला वर्ग आणि सामाजिक संघटनांचे लक्ष लागले आहे. (Jambut News)