Newasa News : “जन्मोजन्मी हाच पती मिळावा…” हे वाक्य अनेकदा ऐकतो, पण नेवासा तालुक्यातील शिरेगावच्या एका सुनबाईंनी ते प्रत्यक्ष कृतीतून दाखवून दिले आहे. पतीच्या प्राण वाचवण्यासाठी स्वतःची किडनी दान करत तिने पतीधर्मासोबतच माणुसकीचा नवा आदर्श निर्माण केला आहे. (Newasa News)

काय आहे घटना?

शिरेगाव येथील रहिवासी ॲड. गंगाधर रंगनाथ तुवर (वय ४०) हे गेल्या दोन वर्षांपासून किडनीच्या दुर्धर आजाराने त्रस्त होते. सर्व उपचार करूनही अखेर किडनी प्रत्यारोपण हाच एकमेव पर्याय असल्याचे डॉक्टरांनी सांगितले. (Newasa News)

कुटुंबावर दुःखाचा डोंगर कोसळला असतानाच त्यांच्या पत्नी दिपाली गंगाधर तुवर (वय ३५) यांनी एक धाडसी आणि हृदयाला पाझर फोडणारा निर्णय घेतला कोणताही मागचा-पुढचा विचार न करता त्यांनी आपली एक किडनी पतीला दान करण्याची तयारी दर्शवली. (Newasa News)

यशस्वी शस्त्रक्रिया

छत्रपती संभाजीनगर येथील सिटी केअर हॉस्पिटलचे सुप्रसिद्ध नेफ्रॉलॉजिस्ट व किडनी प्रत्यारोपण तज्ञ डॉ. श्रीगणेश बर्नेला यांच्या नेतृत्वाखाली दोन दिवसांपूर्वी या दाम्पत्याची यशस्वी किडनी प्रत्यारोपण शस्त्रक्रिया पार पडली. या शस्त्रक्रियेमुळे ॲड. तुवर यांना नवे जीवनदान मिळाले आहे. सध्या दोन्ही पती-पत्नीची प्रकृती स्थिर असून काळजीचे कारण नसल्याचे डॉक्टरांनी सांगितले आहे. (Newasa News)

प्रेरणादायी त्याग

दिपाली ताईंचा हा त्याग समाजातील प्रत्येकासाठी प्रेरणादायी आहे. “प्रत्येक यशस्वी पुरुषामागे एका स्त्रीचा हात असतो” या म्हणीचा प्रत्यय त्यांनी आणून दिला आहे. दिपाली या मूळच्या मालुंजा, ता. राहुरी येथील सुभाष दादा पवार यांच्या कन्या असून त्यांच्यावर झालेले संस्कार या त्यागातून दिसून येत असल्याची भावना ग्रामस्थ व्यक्त करत आहेत. या दाम्पत्याला दोन मुले असून आई-वडील दोघेही सुखरूप असल्याने तुवर कुटुंबात आनंदाचे वातावरण आहे. दिपाली ताईंच्या या महान त्यागाबद्दल शिरेगावसह संपूर्ण नेवासा तालुक्यातून कौतुकाचा वर्षाव होत आहे. (Newasa News)

Newasa News : पत्नीने पतीला दिले किडनीदान; शिरेगाव येथील दाम्पत्याच्या अतूट प्रेमाची अनोखी कहाणी