प्रभात वृत्तसेवा शिक्रापूर – सणसवाडी (ता. शिरूर) येथे एका व्यक्तीने आपल्या पत्नीच्या डोक्यात कोयत्याने वार करत तिला गंभीर जखमी केल्याची घटना घडली आहे.कौशल्या सोनवणे यांनी घरातील सिलेंडर संपल्याने पतीला सिलेंडर आणण्यासाठी सांगितले होते. सायंकाळी पती बाबासाहेब घरी आल्यानंतर कौशल्या यांनी सिलेंडर का आणला नाही? असे विचारले असता त्यांच्यात वाद झाला. त्या रात्री कौशल्या उपाशी झोपी गेल्या. पहाटेच्या सुमारास बाबासाहेब उठले असता त्या दोघांत पुन्हा वाद झाला. रागाच्या भरात बाबासाहेब यांनी घरातील ऊसतोडणीचा कोयता घेऊन कौशल्या यांच्या डोक्यात वार करत जखमी केले. या घटनेत कौशल्या सोनवणे जखमी झाल्या असून कौशल्या बाबासाहेब सोनवणे (वय ३५, सध्या रा. सणसवाडी, मूळ रा. चोंडी ता. धारूड, जि. बीड) यांच्या फिर्यादीवरून शिक्रापूर पोलिसांनी बाबासाहेब हरिकिसन सोनवणे (वय ४१) याच्या विरुद्ध गुन्हा दाखल केला असून, पुढील तपास पोलीस हवालदार रविकिरण जाधव करत आहेत.
