Eknath Shinde : आज मराठा आरक्षणाचा दुसरा दिवस असून, मुंबईत दाखल झालेले मराठा बांधव आता चांगलेच आक्रमक झाले आहेत. आता मराठा बांधवांनी थेट मुंबईच्या आझाद मैदानाला लागून असलेल्या रस्त्यावर ठिय्या आंदोलन करण्यास सुरूवात केली आहे. मराठ्यांच्या एकजूटीमुळे सरकारची मोठी कोंडी झाली आहे. अशातच काल रात्री मुंबईत केंद्रीय गृहमंत्री अमित शाह दाखल झाले आहेत. ते दोन दिवसांच्या मुंबई दौऱ्यावर असून आज मुंबईतील गणेश मंडळांना ते भेट देणार आहेत.

गणेश मंडळांना भेटी दिल्यानंतर अमित शाह हे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या निवासस्थानी जाणार असल्याचं सांगण्यात आलं आहे. अमित शाह यांचा मुंबई दौरा आपटून एकनाथ शिंदे शनिवारी सातारा दरे गावाला जाणार असल्याची माहिती समोर आली आहे. गावच्या गणपतीचे दर्शन घेण्यासाठी शिंदे हे आपल्या मूळ गावी जाणार असल्याची माहिती आहे.

राजकीय वर्तुळात चर्चांना उधाण 

मात्र, दुसरीकडे मनोज जरांगे हे आझाद मैदानावर उपोषणास बसले आहेत. त्यांच्या उपोषण स्थळाला काही राजकीय नेत्यांनी भेट दिली आहे. मात्र, अद्यापपर्यंत सरकारच्या वतीने कोणतेही प्रतिनिधींनी जरांगेंच्या उपोषण स्थळाला भेट दिलेली नाही. काल सरकारचे प्रतिनिधी जरांगेंच्या भेटीला जाणर असल्याची माहिती आली होती. या सगळ्या वातावरणात उपमुख्यमंत्री एकनाथ शिंदे त्यांच्या सातारा जिल्ह्यातील दरे गावी जाणार असल्याने राजकीय वर्तुळात चर्चांना उधाण आले आहे.

चर्चेततून काही तोडगा निघणार?

केंद्रीय मंत्री अमित शाह हे मुंबई दौऱ्यावर आले आहेत. या दौऱ्यात विविध मुद्यावर चर्चा होणार आहे, अशी माहिती मिळत आहे. बैठकीत मराठा आरक्षणाचा मुद्या, बिहार विधानसभा निवडणुका आणि उपराष्ट्रपतीपदाच्या निवडणुकीसंदर्भात चर्चा झाल्याचं बोललं जात आहे. याबाबतची माहिती विनोद तावडे यांनी अमित शाह यांना दिली असल्याचं सांगण्यात आलं आहे. यामुळे या चर्चेततून काही तोडगा निघणार हे पाहणं अत्यंत महत्वाचं असणार आहे.

हेही वाचा :मनोज जरांगेंच्या आंदोलनाचा आज दुसरा दिवस; मराठा बांधवांची तुफान गर्दी अन् राज्य सरकारचा मोठा निर्णय