School Bus Fare Hike – पेट्रोल, डिझेलच्या दरात सतत वाढ होत असल्याने शालेय विद्यार्थी वाहतूक स्कूल बसची भाडेवाढ होणार आहे. यामध्ये तब्बल १५ ते २० टक्के एवढी भरमसाठ वाढ होणार असून १ जून पासून ती लागू केली जाणार आहे. यातून पालकांना मोठा आर्थिक भुर्दंड सहन करावा लागणार आहे. नवीन शैक्षणिक वर्ष १५ जूनपासून सुरू होत आहे तर राज्य मंडळाव्यतिरिक्त अन्य बोर्डाच्या शाळा त्याआधीच सुरू होणार आहेत.

पेट्रोल, डिझेलच्या दरात वाढ होत असल्याने स्कूल बस भाडे दरात वाढ करण्याबाबतच्या हालचाली सुरु होत्या. त्यानुसार पुणे आणि पिंपरी- चिंचवड बस असोसिएशनच्या शालेय विभागाच्या पदाधिकाऱ्यांची गुरुवारी (दि.२८) पुण्यात बैठक झाली. या बैठकीला पुणे बस अँड कार ओनर्स असोसिएशनचे अध्यक्ष राजन जुनवणे, दिपक कुलापुरे, सचिन पंचमुख, रोहिदास दगडे, सागर चौधरी व इतर पदाधिकारी उपस्थित होते.

पेट्रोल, डिझेलच्या दरवाढीमुळे वाहतूक व्यवसायिकांचे कंबरडे मोडले आहे. याची झळ शालेय विद्यार्थी वाहतूक करणाऱ्या हजारो गाड्यांना बसणार आहे. त्यातच टायर, बसेसच्या पार्टसच्या खर्चातही वाढ होत आहे. गेल्या वर्षभरामध्ये टायर बॅटरी युरो-६ गाड्यांना लागणारे ऍड ब्ल्यू याची प्रचंड प्रमाणात दरवाढ झाली आहे. त्यात आता इंधन दरवाढीची भर पडली आहे.

दरमहा, ३०० ते ५०० रुपयांपर्यंत वाढ
शालेय विद्यार्थी वाहतूक करणाऱ्या बसवरील खर्चाचा बोजा वाढणार आहे. इंधन दरवाढीमुळे बसचा खर्च वाढणार आहे, तेवढीच भाडेवाढ मिळावी एवढीच बस वाहतुकदारांची अपेक्षा आहे. यातुन कुठल्याही प्रकारची कमाई करायचा हेतु नाही. शासनाने शालेय विद्यार्थी वाहतुकीवर आधीच ३० ते ३५ विविध प्रकारचे नियम, निर्बंध लादले आहेत. प्रत्येक गोष्टीला भरपूर पैसा खर्च होतो, अशी व्यथाही बैठकीत मांडण्यात आली त्यानुसार दरमहा ३०० ते ५०० रुपये पर्यंत भाडेवाढीबाबतचा निर्णय घेण्यात आला आहे.

“शालेय बस वाहतुकदारांची इच्छा नसताना सुद्धा ही दरवाढ करावी लागत आहे. अंदाजे दहा रुपये प्रति लिटर डिझेल वाढले आहे. त्यामुळे शालेय बसभाड्यातही वाढ करावी लागत आहे. पालकांनी याबाबत योग्य ते सहकार्य करून शालेय वाहतुकदारांना ही दरवाढ द्यावी. त्यामुळे विद्यार्थी वाहतूक सुरळीत करण्यात येईल.”
– राजन जुनवणे, अध्यक्ष, पुणे बस अँड कार ओनर्स असोसिएशन