Online School : राज्यात सातत्याने वाढत असलेल्या पेट्रोल-डिझेलच्या दरांचा परिणाम आता शिक्षण व्यवस्थेवरही दिसू लागला आहे. नव्या शैक्षणिक सत्राच्या सुरुवातीपूर्वीच स्कूल बस चालक आणि मालक आर्थिक संकटात सापडले असून, त्याचा थेट परिणाम विद्यार्थ्यांच्या वाहतुकीवर होण्याची शक्यता व्यक्त केली जात आहे. (Online School)

वाढत्या इंधन खर्चामुळे जुन्या दरात बस सेवा चालवणे शक्य नसल्याचे स्कूल बस संघटनांचे म्हणणे आहे. त्यामुळे सरकारने आठवड्यातील काही दिवस प्रत्यक्ष शाळा आणि उर्वरित दिवस ऑनलाइन वर्ग असा पर्याय विचारात घ्यावा, अशी मागणी पुढे येत आहे. (Online School)

स्कूल बस संघटनांनी राज्य सरकारकडे तातडीने भूमिका स्पष्ट करण्याची मागणी केली आहे. जूनपासून शाळा सुरू होण्यापूर्वीच बस भाड्यात वाढ करावी लागणार असल्याचे संकेत संघटनांकडून देण्यात आले आहेत. इंधन दरवाढीमुळे बस चालकांचे खर्च मोठ्या प्रमाणात वाढले असून, सरकारने अनुदान किंवा कर सवलत देऊन दिलासा द्यावा, अशीही मागणी करण्यात आली आहे.

मागील दहा दिवसांत पेट्रोल आणि डिझेलच्या दरात चार वेळा वाढ झाली आहे. पेट्रोलमध्ये सुमारे ७.३८ रुपये, तर डिझेलमध्ये ७.०९ रुपयांची वाढ नोंदवली गेली आहे. अनेक शहरांमध्ये पेट्रोलचा दर ११० रुपयांच्या पुढे गेल्याने वाहतूक व्यवसायावर मोठा आर्थिक ताण निर्माण झाला आहे. (Online School)

दरम्यान, नागपुरातील स्कूल बस आणि व्हॅन संघटनांनी १० ते १५ टक्के भाडेवाढ करण्याचा निर्णय घेतला आहे. त्यामुळे पालकांच्या खर्चातही वाढ होणार आहे. पूर्वी १००० रुपये भाडे भरणाऱ्या पालकांना आता १२०० रुपये, तर २००० रुपयांच्या सेवेसाठी २४०० रुपये मोजावे लागू शकतात. या प्रस्तावित दरवाढीला परिवहन विभाग मंजुरी देतो का, याकडे सर्वांचे लक्ष लागले आहे. (Online School)

याशिवाय विदर्भात उष्णतेची लाट कायम असल्याने शाळा सुरू होण्याची तारीख पुढे ढकलण्याची शक्यताही वर्तवली जात आहे. अनेक भागांमध्ये तापमान ४५ अंश सेल्सिअसच्या पुढे गेल्याने १५ जूनऐवजी २६ जूनपासून शाळा सुरू करण्याबाबत सरकारमध्ये चर्चा सुरू असल्याची माहिती समोर येत आहे. यासंदर्भात शालेय शिक्षण विभाग लवकरच बैठक घेऊन अंतिम निर्णय जाहीर करण्याची शक्यता आहे. (Online School)