पुणे :  पेट्रोल, डिझेलच्या दरात दिवसेंदिवस वाढ होत असून यामुळे आता शालेय बसचे भाडेही वाढणार आगहे. याबाबत शालेय बस असोसिएशनच्या पातळीवर जोरदार हालचाली सुरु झालेल्या आहेत. या बसची भाडेवाढ होणार असल्याने पालकांना त्याची मोठी आर्थिक झळ सोसावी लागणार आहे.

नवीन शैक्षणिक वर्ष येत्या १५ जून पासून सुरु होणार आहे. राज्य मंडळाव्यतिरिक्त अन्य बोर्डाच्या शाळा त्याआधीच सुरु होत असतात. शाळा सुरु होण्याच्या पार्श्वभुमीवर विद्यार्थी अन पालकांचीही लगबग सुरु झालेली आहे. पश्चिम आशियातील युध्दामुळे जागतिक बाजारातील कच्च्या इंधनाचे दर दररोज वाढत आहेत.

त्यामुळे सार्वजनिक इंधन कंपन्यांनी इंधनाचे दर वाढविले आहेत. पेट्रोल, डिझेल दरात वाढ होतच आहे. इंधनाची बचत करण्याबाबत पतंप्रधान नरेंद्र मोदी यांनी जनतेला आवाहनही केले आहे. त्यामुळे शाळा ऑनलाईन सुरु करण्याबाबतही चर्चा सुरु असली तरी त्याबाबत अद्याप संभ्रम आहे.

पुणे शहरात सुमारे ४ हजार स्कूल बस आहेत. या बसच्या माध्यमातुन मोठ्या प्रमाणात विद्यार्थ्यांना वाहतुक सुविधा पुरविण्यात येत असतात. वाढत्या महागाईमुळे आधीच पालक आर्थिक अडचणीच सापडलेले आहेत. त्यात आता गेल्या काही दिवसांपासून पेट्रोल आणि डिझेलच्या दरात सातत्याने वाढ होत आहे. ही वाढ थांबायला काही तयार नाही. त्यामुळे स्कुल बस, रिक्षा, व्हॅन यांचीही भाडेवाढ होणार आहे.

पेट्रोल, डिझेलच्या दरात भरमसाठ वाढ होतच चालली आहे. त्यामुळे स्कूल बसेसची भाडेवाढ करावीच लागणार आहे. त्याशिवाय काहीच पर्याय नाही. मात्र भाडेवाढ किती करायची, याबाबत अद्याप कोणताही अंतिम निर्णय झालेला नाही. भाडेवाढीबाबत येत्या गुरुवारी (दि.२८) स्कूल बस चालकांची बैठक घेण्यात येणार आहे. त्यात सविस्तर चर्चा करण्यात येणार आहे.
– रोहिदास दगडे, उपाध्यक्ष, स्कूल बस असोसिएशन