School Accident – वाकड येथील पोदार इंटरनॅशनल या शाळेत स्लायडिंग गेट कोसळून जखमी झालेल्या सुरक्षा रक्षक गंभीर जखमी झाला. उपचारादरम्यान २ ऑगस्ट रोजी त्यांची प्राणज्योत मालवली. या घटनेनंतर शाळा व्यवस्थापनाच्या निष्काळजीपणामुळेच हा दुर्दैवी प्रकार घडल्याचा आरोप होत असून, संबंधितांवर कठोर कारवाईची मागणी जोर धरत आहे. सुदैवाने त्‍यावेळी विद्यार्थी आसपास नव्‍हते.

विशेष म्‍हणजे ही घटना घडल्‍यानंतर जखमीला रुग्‍णालयात नेण्‍यासाठी वाहनही त्‍वरीत मिळाले नसल्‍याचे सोशल मीडियावरून व्‍हायल झालेल्‍या व्‍हिडिओमधून दिसून येत आहे. संजय नागनाथ कांबळे (वय ५२, रा. ताथवडे) असे अपघातात मृत्‍यू झालेल्‍या सुरक्षा रक्षकाचे नाव आहे. या घटनेनंतर पोदार शाळेतील पालक आणि आसपासच्‍या परिसरात राहणा-या नागरिकांनी शाळेतील सुरक्षा व्यवस्थेवर प्रश्नचिन्ह उपस्थित केले आहे.

विद्यार्थ्यांची मोठी वर्दळ असलेल्या परिसरातील जड लोखंडी गेटची नियमित तपासणी झाली होती का, सुरक्षेचे ऑडिट करण्यात आले होते का आणि संभाव्य धोका टाळण्यासाठी आवश्यक उपाययोजना का करण्यात आल्या नाहीत, असे प्रश्न उपस्थित केले जात आहेत. दरम्यान, या प्रकरणात निष्काळजीपणासाठी जबाबदार असलेल्या व्यक्तींवर सदोष मनुष्यवधासह लागू होणाऱ्या कायदेशीर तरतुदींनुसार गुन्हा नोंदवून सखोल चौकशी करण्याची मागणी विविध स्तरांतून होत आहे. या दुर्घटनेमुळे शाळांमधील सुरक्षा मानके आणि कर्मचाऱ्यांच्या सुरक्षिततेचा प्रश्न पुन्हा एकदा ऐरणीवर आला आहे.

“शाळेची बस आल्‍याने घाईघाईत गेट उघडताना ही घटना घडली आहे. या घटनेत सुरक्षा रक्षकाचा मृत्‍यू झाला असून याबाबत आकस्‍मात मयत म्‍हणून नोंद करण्‍यात आली आहे. तसेच चौकशीनंतर पुढील कार्यवाहीबाबत निर्णय घेतला जाईल.”
– विठ्‌ठल साळुंके, वरिष्‍ठ निरीक्षक, वाकड पोलीस ठाणे