Satwik Chirag Enter Singapore Open 2026 Final : सिंगापूर ओपन सुपर ७५० बॅडमिंटन स्पर्धेत ३० मे रोजी पुरुष दुहेरीच्या उपांत्य फेरीत एक अभूतपूर्व आणि खळबळजनक उलटफेर पाहायला मिळाला. भारताची स्टार जोडी सात्विकसाईराज रंकीरेड्डी आणि चिराग शेट्टी हिने जागतिक क्रमवारीत पहिल्या क्रमांकावर असलेल्या दक्षिण कोरियाच्या किम वोन हो आणि सिओ सेउंग जे या जोडीचा सरळ दोन सेटमध्ये पराभव करत अंतिम फेरीत धडक मारली आहे.

दोन्ही सेटमध्ये जबरदस्त कमबॅक; कोरियन जोडीची पिसं काढली!

सध्या जगात चौथ्या क्रमांकावर असलेल्या सात्विक-चिरागसाठी हा सामना अजिबात सोपा नव्हता. जागतिक क्रमवारीत नंबर-१ असलेल्या जोडीला नमवण्यासाठी भारतीय वाघांना कोर्टवर तब्बल एक तास कडक संघर्ष करावा लागला. या सामन्यात भारतीय जोडीला विजयाचे प्रबळ दावेदार मानले जात नव्हते, परंतु सात्विक-चिरागने आपल्या अद्भूत खेळाच्या जोरावर सर्व समीक्षक आणि चाहत्यांना थक्क केले. पहिल्या सेटमध्ये ब्रेक होईपर्यंत दक्षिण कोरियाची जोडी १३-११ अशी पुढे होती.

Straight sets, pure dominance! 🔥

Satwik and Chirag storm into the FINALS of the Singapore Open 2026 after taking down the top seeds. The boys are unstoppable! 🇮🇳🏸 pic.twitter.com/o6qLUlOthm

— BAI Media (@BAI_Media) May 30, 2026

मात्र, ब्रेकनंतर सात्विक-चिरागने सामन्याचा नूरच बदलला आणि अप्रतिम पुनरागमन करत पहिला सेट २१-१९ असा आपल्या नावावर केला. दुसऱ्या सेटमध्येही कोरियन जोडी १४-११ अशी आघाडीवर होती आणि सामना तिसऱ्या सेटमध्ये जाणार असे दिसत होते. पण, अत्यंत मोक्याच्या क्षणी भारतीय जोडीने आक्रमक खेळ करत दुसरा सेट २१-१८ असा जिंकून फायनलचे तिकीट पक्के केले.

हेही वाचा – Vinesh Phogat Loss : सुप्रीम कोर्टात जिंकली पण मॅटवर हरली! उपांत्य फेरीतील पराभवानंतर विनेश फोगाटचं आशियाई खेळांचं स्वप्न भंगलं

फायनलमध्ये इंडोनेशियाच्या जोडीशी होणार ‘महायुद्ध’!

Satwik-Chirag Storm Into The Singapore Open Super 750 Final!
pic.twitter.com/6VIupAUgzV

The Indian Duo Defeated World No. 1 And Reigning World Champions Kim Won Ho/Seo Seung Jae 21-19, 21-18 In A Stunning Semi-Final Victory To Book Their Spot In The Final. 🇮🇳🏸#SingaporeOpen2026

— BoAnalyst Sports (@BoAnalystSports) May 30, 2026

सात्विक आणि चिरागच्या जोडीने आपल्या कारकिर्दीत पहिल्यांदाच सिंगापूर ओपन सुपर ७५० स्पर्धेच्या फायनलमध्ये प्रवेश केला असून आता त्यांची नजर ऐतिहासिक जेतेपदावर आहे. ३१ मे रोजी होणाऱ्या महाअंतिम सामन्यात सात्विक-चिरागचा सामना इंडोनेशियाच्या तिसऱ्या मानांकित फजर अल्फियान आणि मुहम्मद शोहिबुल फिक्री या जोडीशी होईल. इंडोनेशियन जोडीने दुसऱ्या सेमीफायनलमध्ये चीनच्या लियांग वेई कांग आणि चांग वांग या जोडीचा २३-२१, २१-४ असा धुव्वा उडवत खिताबी सामन्यात प्रवेश केला आहे.