Satara ZP Election Results – कोयना विभागातील हेळवाक जिल्हा परिषद गट तसेच हेळवाक व येराड पंचायत समिती गणात झालेल्या निवडणुकांनी राजकीय समीकरणे बदलून टाकली आहेत. भाजपमध्ये गेलेल्या पाटणकर गटाचा बालेकिल्ला मानल्या जाणाऱ्या या भागात शिवसेनेने जिल्हा परिषदेसह पंचायत समितीच्या दोन्ही गणांवर विजय मिळवत सत्तांतर घडवून आणले आहे. तब्बल साडेचार दशकांनंतर कोयना विभागात झालेले हे परिवर्तन राजकीयदृष्ट्या अत्यंत महत्त्वाचे मानले जात आहे. विधानसभा निवडणुकीत पालकमंत्री शंभूराज देसाई यांनी येथून मोठे मताधिक्य घेतल्यामुळे ही निवडणूक प्रतिष्ठेची बनली होती. त्यामुळे ही लढत केवळ स्थानिक स्वराज्य संस्थेपुरती मर्यादित न राहता पाटणकर गटाच्या राजकीय अस्तित्वाचीच ठरली होती. मात्र तिकीट वाटपाच्या टप्प्यावर भाजपने उमेदवार बदलल्याने डोंगर, पठार भागात पाटणकर गटात असंतोष पसरला. ऐनवेळी भाजपकडून दत्तात्रय कदम यांना उमेदवारी देण्यात आली. सातारा जिल्हा परिषद याउलट शिवसेनेने कोणताही संभ्रम न ठेवता एकमताने अशोकराव पाटील यांना उमेदवारी दिली. ठाकरे गटाकडून महेश शेलार तर राष्ट्रीय काँग्रेसकडून डॉ. संतोष कदम रिंगणात उतरल्याने निवडणूक बहुरंगी आणि चुरशीची झाली.हेळवाक जिल्हा परिषद गटात शिवसेनेचे अशोकराव पाटील यांनी १०,५७९ मते मिळवत भाजपचे दत्तात्रय कदम (९,५३३) यांचा १,०४६ मतांनी पराभव केला. ठाकरे गटाचे महेश शेलार यांना ४९०, तर काँग्रेसचे डॉ. संतोष कदम यांना ३४७ मते मिळाली.हेळवाक पंचायत समिती गणात भाजपच्या वैशाली कांबळे आणि शिवसेनेच्या मंगल माने यांच्यात अटीतटीचा सामना झाला. मतमोजणीअंती मंगल माने यांनी ४,८८५ मते मिळवत ४,२९६ मते मिळवलेल्या वैशाली कांबळे यांचा ५८९ मतांनी पराभव करत विजय संपादन केला. येराड पंचायत समिती गणातही शिवसेनेच्या विद्या शिंदे यांनी ५,७४२ मते मिळवत भाजपच्या वंदना सुनील शिंदे यांचा ८३४ मतांनी पराभव करून परिवर्तन घडवून आणले. जिल्हा परिषद गटाची उमेदवारी जाहीर करताना भाजपाने घेतलेली बोटचेपी भूमिका आणि त्यानंतर डोंगरी भागातून राजेश शिंदे यांनी केलेला उठाव हे या पराभवामागील महत्त्वाचे कारण ठरल्याची चर्चा राजकीय वर्तुळात आहे.
