Koyananagar News : कोयनानगरच्या (Koyananagar News) पोलीस प्रशिक्षण केंद्र आणि राज्य आपत्ती प्रतिसाद दलाच्या (एमडीआरएफ) मुख्यालयाच्या प्रकल्पाचे काम सुरू होण्याचा मार्ग मोकळा झाला आहे. शासनाची मान्यता मिळूनही तीन वर्षे प्रशासकीय प्रक्रियेत अडकलेल्या या प्रकल्पाच्या बांधकामासाठी मंत्री शंभूराज देसाई यांच्या पाठपुराव्यामुळे २०२६ मध्ये निविदा प्रक्रिया राबविण्यात आली आहे.

कोयना धरण, सह्याद्रीच्या पर्वतरांगा आणि भूकंपप्रवण परिसर अशी कोयनानगरची ओळख आहे. एका बाजूला कोयना जलविद्युत प्रकल्पामुळे राज्याच्या ऊर्जा विकासात या परिसराने मोलाचे योगदान दिले आहे, तर दुसरीकडे नैसर्गिक आपत्तींच्या संभाव्य धोक्यांमुळे या भागात सक्षम आपत्ती व्यवस्थापन यंत्रणेची गरज कायम अधोरेखित होत आहे.

पश्चिम महाराष्ट्रातील पूरस्थिती, कोकणातील अतिवृष्टी, दरडी कोसळण्याच्या घटना आणि भूकंपाचा धोका लक्षात घेता, कोयनानगर येथे एसडीआरएफ मुख्यालय आणि पोलीस प्रशिक्षण केंद्र उभारण्याचा प्रस्ताव विशेष महत्त्वाचा (Koyananagar News) मानला जात आहे.

या प्रकल्पासाठी गोकुळ तर्फ हेळवाक येथील ३८.९३ हेक्टर क्षेत्र निश्चित करण्यात आले आहे. ४ डिसेंबर २०२३ रोजी शासनाने या प्रकल्पासंदर्भात मान्यता दिली. मात्र, मंजुरीनंतर प्रत्यक्ष बांधकामाची प्रक्रिया सुरू होण्यासाठी बराच कालावधी गेल्याने हा प्रकल्प नेमका कधी मार्गी लागणार, याबाबत उत्सुकता कायम होती. आता बांधकामासाठी निविदा प्रक्रिया पुढे आल्याने या प्रतीक्षेला काही प्रमाणात दिलासा मिळाला आहे.

महाराष्ट्र राज्य पोलीस गृहनिर्माण व कल्याण महामंडळामार्फत २०२६ मध्ये विविध इमारतींच्या बांधकामासाठी निविदा प्रक्रिया राबविण्यात आली. त्यामुळे प्रकल्पाच्या अंमलबजावणीसाठी आवश्यक असलेल्या पुढील टप्प्यांना महत्त्व प्राप्त झाले आहे. अर्थात, निविदा प्रक्रिया पूर्ण होणे आणि प्रत्यक्ष बांधकाम सुरू होणे या स्वतंत्र बाबी असल्याने आता प्रशासनाकडून पुढील कार्यवाही किती वेगाने होते, याकडे सर्वांचे लक्ष लागले आहे.

प्रस्तावित एमडीआरएफ मुख्यालयामुळे आपत्तीच्या काळात बचावकार्य अधिक प्रभावीपणे राबविण्यास मदत होऊ शकते. प्रशिक्षित पथके, आवश्यक साधनसामग्री आणि समन्वय यंत्रणा उपलब्ध झाल्यास पूरग्रस्त भागांमध्ये मदतकार्य, दरड कोसळलेल्या ठिकाणी बचावकार्य आणि अन्य आपत्कालीन परिस्थितींमध्ये तातडीने प्रतिसाद देणे सुलभ होण्याची अपेक्षा आहे. पोलीस प्रशिक्षण केंद्रामुळे प्रशिक्षणासाठी आवश्यक पायाभूत सुविधा विकसित होण्याचाही मार्ग मोकळा होऊ शकतो.

सोनारखडी परिसराला येणार सोन्याचे दिवस!
गोकुळ तर्फ हेळवाक येथील सोनारखडी परिसरात पोलीस प्रशिक्षण केंद्र आणि आपत्कालीन व्यवस्था केंद्राची उभारणी होत आहे. याच परिसरापासून सुमारे एक किलोमीटर अंतरावर हेळवाक येथे कोयना नदीवर बोटिंग व नौकाविहार केंद्र विकसित होत आहे.

एकाच भागात साकारत असलेल्या या दोन महत्त्वपूर्ण प्रकल्पांमुळे सोनारखडी-हेळवाक परिसराचे महत्त्व वाढणार आहे. प्रशासकीय आणि पर्यटन सुविधांची उभारणी, रोजगाराच्या संधी आणि स्थानिक व्यवसायांना मिळणारी चालना यामुळे या परिसराच्या विकासाला नवी दिशा (Koyananagar News) मिळण्याची अपेक्षा आहे. त्यामुळे आगामी काळात सोनारखडी-हेळवाक परिसराला खऱ्या अर्थाने ‘सोन्याचे दिवस’ येण्याची आशा निर्माण झाली आहे.