Satara News – सातारा शहरातील मध्यवर्ती आणि सर्वाधिक वर्दळीच्या राजवाडा परिसरातील पार्किंगची समस्या आता कायमस्वरूपी मार्गी लागण्याच्या दिशेने वाटचाल सुरू झाली आहे. अळूचा खड्डा परिसरातील सुमारे 22 गुंठे जागेत तीन मजली अत्याधुनिक पार्किंग उभारण्यात येणार असून, या महत्त्वाकांक्षी प्रकल्पासाठी सुमारे 66 कोटी रुपयांचा निधी उपलब्ध झाल्याची माहिती सातारा पालिका पदाधिकार्‍यांनी दिली.

लवकरच या कामाची निविदा काढण्यात येणार आहे. दरम्यान, आळूचा खड्डा येथील प्रस्तावित पार्किंग परिसराची पाहणी नगराध्यक्ष अमोल मोहिते, उपनगराध्यक्ष अ‍ॅड. दत्ता बनकर, भाजपचे गटनेते अविनाश कदम, आरोग्य सभापती धनंजय जांभळे, नियोजन सभापती अशोक शेडगे, मुख्याधिकारी विनोद जळक आणि नियंत्रण अधिकारी दिलीप चिद्रे यांनी गुरुवारी सायंकाळी केली.

पार्किंगच्या जागेला लागून एका खासगी विकसकाची जागा असून, त्या ठिकाणी मोजणीचे काम सुरू होते. पालिकेच्या जागेचे कोणत्याही प्रकारे नुकसान होऊ नये, तसेच जागेची हद्द निश्चित राहावी, यासाठी पालिका पदाधिकारी व अधिकारी तातडीने घटनास्थळी दाखल झाले. यावेळी आवश्यक सूचना करण्यात आल्या.

खाऊ गल्लीसह परिसराचे सुशोभीकरण
खासदार उदयनराजे भोसले आणि सार्वजनिक बांधकाम मंत्री शिवेंद्रसिंहराजे भोसले यांच्या मार्गदर्शनाखाली राजवाडा परिसराच्या विकासासाठी विविध कामांना गती देण्यात येत आहे. राजवाडा येथील जिल्हा परिषदेच्या पशुवैद्यकीय दवाखान्याची जागा लवकरच सातारा पालिकेकडे हस्तांतरित होणार असून, या जागेवर सुसज्ज आणि आकर्षक ‘खाऊ गल्ली’ उभारण्याचे नियोजन आहे. त्याला लागून असलेल्या सुमारे 22 गुंठे जागेत बहुमजली पार्किंग उभारण्यात येणार आहे.

वाहतूक कोंडीवरही उतारा
राजवाडा चौपाटी, राजवाडा परिसर आणि लगतच्या बाजारपेठेत गर्दीच्या वेळेत वाहतूक कोंडीची समस्या निर्माण होते. ही समस्या लक्षात घेऊन ना. शिवेंद्रसिंहराजे भोसले यांच्या पाठपुराव्याने पालिकेने तीन मजली पार्किंगचा आराखडा तयार केला आहे. या पार्किंगमुळे राजवाडा परिसरात येणार्‍या नागरिकांना मोठा दिलासा मिळणार असून, रस्त्यांवरील अनधिकृत पार्किंग कमी होऊन वाहतुकीला शिस्त लागण्यास मदत होणार आहे.

निधी उपलब्ध; निविदेकडे लक्ष
वैशिष्ट्यपूर्ण योजना अनुदानांतर्गत या प्रकल्पासाठी सुमारे 66 कोटी रुपयांचा निधी उपलब्ध झाल्याने प्रकल्पाच्या प्रत्यक्ष कामाला आता गती मिळण्याची शक्यता असून, लवकरच निविदा प्रक्रिया सुरू केली जाणार आहे.