Satara Municipal Council – सातारा पालिकेच्या गुरुवारी झालेल्या सर्वसाधारण सभेत अनपेक्षित राजकीय घडामोडी घडल्याने ही सभा चांगलीच चर्चेत राहिली. खासदार उदयनराजे भोसले समर्थक गटाने ऐनवेळी सभेवर बहिष्कार टाकल्याने त्यांच्या सहभागाशिवायच अवघ्या अर्ध्या तासात 46 विषयांना मंजुरी देण्यात आली. सभेला 50 पैकी 28 नगरसेवक उपस्थित राहिल्याने आवश्यक कोरम पूर्ण झाला आणि सर्व विषयांवर मंजुरीचा शिक्का उमटला.

सभेच्या अध्यक्षस्थानी नगराध्यक्ष अमोल मोहिते होते. सभेपूर्वी सर्व काही सुरळीत असल्याचे चित्र असताना मागील सर्वसाधारण सभेच्या इतिवृत्तावरून निर्माण झालेल्या वादामुळे खासदार गटाने अचानक सभेला अनुपस्थित राहण्याचा निर्णय घेतल्याची चर्चा पालिका वर्तुळात रंगली. मागील सभेत उपनगराध्यक्ष अ‍ॅड. दत्ता बनकर आणि बांधकाम सभापती बाळासाहेब खंदारे यांच्यात झालेल्या शाब्दिक चकमकीचे सविस्तर वर्णन इतिवृत्तात समाविष्ट करण्यात आले होते.

त्या इतिवृत्तावर नगराध्यक्षांची स्वाक्षरी झाल्याने संबंधित बाब उपनगराध्यक्षांच्या जिव्हारी लागल्याचे बोलले जात असून, त्यातूनच बहिष्काराचा निर्णय झाल्याची चर्चा राजकीय वर्तुळात होती. मात्र, नंतर संबंधित मजकूर वगळून इतिवृत्त मंजूर करण्यात आल्याचा दावाही करण्यात आला. तरीही खासदार गटाचे 22 नगरसेवक सभेला गैरहजर राहिल्याने भाजपमधील अंतर्गत समन्वयाबाबत पुन्हा प्रश्न उपस्थित झाले आहेत.

महत्त्वाच्या विकासकामांना मंजुरी
सभेत शहर विकासाशी संबंधित अनेक महत्त्वपूर्ण विषयांना हिरवा कंदील देण्यात आला. त्यामध्ये शहरात सीसीटीव्ही यंत्रणा उभारणे, गॅस पाइपलाइनच्या कामामुळे उकरण्यात आलेल्या पाच प्रभागांतील रस्त्यांच्या दुरुस्तीसाठी सुमारे साडेतीन कोटी रुपयांचा निधी मंजूर करणे, शिवतीर्थावर हायमास्ट दिवे उभारणे, सातारा शहर सुधारित पाणीपुरवठा योजना क्रमांक 2 मंजूर करणे तसेच पालिकेच्या नवीन प्रशासकीय इमारतीच्या विकास आराखड्यास (डीपी) मंजुरी देणे या विषयांचा समावेश होता.

भुयारी गटार योजनेच्या ठेकेदारावर कारवाई
सभेतील सर्वाधिक चर्चेचा विषय ठरला तो भुयारी गटार योजनेच्या ठेकेदारावरील कारवाईचा. संबंधित ठेकेदाराने नियोजित कालावधीत काम पूर्ण न केल्यामुळे त्याची अनामत रक्कम जप्त करून त्याला ब्लॅकलिस्टमध्ये टाकण्याच्या विषयाला सभागृहाने सर्वानुमते मंजुरी दिली. या निर्णयामुळे भविष्यात कामकाजात हलगर्जीपणा करणार्‍या ठेकेदारांवर कठोर कारवाईचा संदेश पालिकेने दिल्याचे मानले जात आहे.

अर्ध्या तासात 46 विषयांचा निपटारा
सकाळी 11 वाजता छत्रपती शिवाजी सभागृहात सुरू झालेली सभा अवघ्या 30 मिनिटांत संपली. सभासचिव वर्षा पाटील यांनी महत्त्वाच्या विषयांचे वाचन केले. काही विषयांवरील उपसूचना मांडल्यानंतर उर्वरित विषयांना नगरसेवकांनी बाके वाजवून मंजुरी दिली. त्यामुळे अल्पावधीत इतक्या मोठ्या संख्येने विषय मंजूर झाल्याचीही चर्चा सुरू झाली.

भाजपमध्ये गटबाजी नसल्याचा दावा
सभेनंतर भाजपचे गटनेते अविनाश कदम यांनी पक्षात कोणतीही गटबाजी नसल्याचा दावा केला. ते म्हणाले, सातारा पालिकेत भाजपची सत्ता असून सर्व नगरसेवकांमध्ये एकवाक्यता आहे. खासदार उदयनराजे भोसले आणि सार्वजनिक बांधकाम मंत्री शिवेंद्रसिंहराजे भोसले यांच्या मार्गदर्शनानुसारच सभागृहाची वाटचाल सुरू आहे. सभेच्या पूर्वसंध्येला पक्षप्रतोद निशांत पाटील, नगराध्यक्ष अमोल मोहिते आणि आमची बैठक झाली होती.

राजकीय चर्चांना उधाण
सभेवर बहिष्कार, त्यानंतर कोरम पूर्ण करून मंजूर झालेले 46 विषय, भुयारी गटार योजनेच्या ठेकेदाराला ब्लॅकलिस्ट करण्याचा निर्णय आणि भाजपमधील समन्वयाबाबत सुरू झालेल्या चर्चांमुळे गुरुवारची पालिकेची सर्वसाधारण सभा शहराच्या राजकीय वर्तुळात चर्चेचा विषय ठरली आहे. आगामी काळात या घडामोडींचे पडसाद पालिकेच्या राजकारणावर उमटण्याची शक्यता व्यक्त केली जात आहे.