Satara Municipal Council – सातारा नगरपरिषदेची सर्वसाधारण सभा गुरुवार, दि. 23 जुलै रोजी छत्रपती शिवाजी सभागृहात होणार असून तब्बल 40 विषयांच्या अजेंड्यामुळे ही सभा राजकीयदृष्टया महत्त्वाची ठरणार आहे. शहरातील चतुर्थ वार्षिक मालमत्ता कर आकारणी, नगरपरिषदेच्या नव्या प्रशासकीय इमारतीसाठी उच्चदाब (एच.टी.) वीज जोडणी, शहरभर सीसीटीव्ही कॅमेरे, विस्तारित पाणीपुरवठा योजना, भुयारी गटार योजना,

गॅस पाइपलाइनसाठी खोदलेल्या रस्त्यांच्या दुरुस्तीवरील कोट्यवधी रुपयांच्या खर्चावर भाजपचे नगरसेवकच आमनेसामने येण्याची चिन्हे आहेत. सभेतील सर्वाधिक चर्चेचा विषय म्हणजे 2027-28 ते 2030-31 या कालावधीसाठी चतुर्थ वार्षिक मालमत्ता कर आकारणीचा प्रस्ताव. वाढीव कराचा नागरिकांवर होणारा परिणाम लक्षात घेता विरोधकांकडून प्रशासनाला धारेवर धरण्याची शक्यता आहे.

त्याचबरोबर शहरातील सर्व प्रमुख ठिकाणी सीसीटीव्ही कॅमेरे बसविणे, विविध भागांत डेकोरेटिव्ह पोल व हायमास्ट उभारणी, मोती तलावाचे विद्युतीकरण आणि नव्या प्रशासकीय इमारतीसाठी महावितरणकडे आवश्यक शुल्क भरण्याच्या विषयांवरही चर्चा अपेक्षित आहे. बीपीसीएलच्या गॅस पाइपलाइन प्रकल्पासाठी विविध प्रभागांतील खोदलेले रस्ते दुरुस्त करण्यासाठी सुमारे साडेतीन कोटी रुपयांच्या खर्चाच्या प्रस्तावावर विशेष लक्ष लागले आहे.

रस्ते खोदाईनंतर नागरिकांना झालेल्या गैरसोयी, डिपॉझिट आणि कामाच्या गुणवत्तेचा मुद्दा पुन्हा ऐरणीवर येण्याची शक्यता आहे. याशिवाय विस्तारित पाणीपुरवठा योजना, सांबरवाडी फिल्टर प्लांटचे आधुनिकीकरण, सोनगाव कचरा डेपो व्यवस्थापन, घनकचरा प्रकल्पासाठी यंत्रसामग्री, दिव्यांग झोन, आधुनिक मच्छीबाजार, वारसा हक्काच्या सफाई कर्मचार्‍यांच्या नियुक्त्या, सुरक्षा रक्षक व करारावरील सेवानिवृत्त कर्मचार्‍यांना मुदतवाढ आदी विषयांवरही निर्णय होणार आहेत.

नगरपरिषदेच्या आगामी निवडणुकांच्या पार्श्वभूमीवर विकासकामांचा वेग, आर्थिक प्राधान्यक्रम, करआकारणी आणि प्रशासनाच्या निर्णयक्षमतेवर सत्ताधारी व विरोधकांमध्ये जोरदार शाब्दिक चकमक होण्याची शक्यता व्यक्त होत असून, शहराच्या पुढील विकासाची दिशा ठरविणारी ही सभा ठरणार असल्याचे राजकीय वर्तुळात बोलले जात आहे. सातारा पालिकेवर खासदार उदयनराजे भोसले व सार्वजनिक बांधकाम मंत्री शिवेंद्रसिंहराजे भोसले यांच्या नेतृत्वा अंतर्गत भाजपचे नगरसेवक सक्रिय आहेत.

भाजप हा शिस्तप्रिय पक्ष आहे तरीसुद्धा खासदार गट व आमदार गट यांच्यातील राजकीयवाद संपायला तयार नाहीत. स्थायी समितीमध्ये खासदार गटाने केलेला वॉक आऊट अजूनही चर्चेत आहे.त्यामुळे गुरुवारी होणारी सातारा नगरपालिकेची सर्वसाधारण सभा सुरळीत पार पडणार की राजकीय रणकंदन होणार याकडे राजकीय वर्तुळाचे लक्ष लागले आहे. पक्षशिस्तीचे संदेश नेत्यांनी कितीही दिले तरी नगरसेवकांमध्ये वाद विशेषता राजकीय अहमंमिटवणे गरजेचे असून त्याचा विकास कामांवर परिणाम होण्याची भीती व्यक्त होत आहे .