Baramati By-election: (डोर्लेवाडी) – बारामती तालुक्यातील निरावागज गावातील नागरिकांनी रस्त्याच्या अत्यंत खराब अवस्थेविरोधात तीव्र नाराजी व्यक्त करत बारामती पोटनिवडणुकीच्या मतदानावर बहिष्कार घालण्याचा इशारा दिला आहे. येथील सुमारे ५०० मतदारांनी यासंदर्भात बारामतीच्या निवडणूक निर्णय अधिकाऱ्यांकडे लेखी निवेदन देत तातडीने रस्ता दुरुस्तीची मागणी केली आहे. निरावागज पन्हाळे व कुंभार वस्ती परिसरातील मुख्य रस्त्यावर मोठमोठे खड्डे पडल्याने नागरिकांचे दैनंदिन जीवन विस्कळीत झाले आहे. विशेषतः शाळकरी विद्यार्थी आणि वयोवृद्ध नागरिकांना या मार्गावरून ये-जा करताना मोठा त्रास सहन करावा लागत आहे. पावसाळ्यापूर्वीच रस्त्याची स्थिती बिकट झाल्याने संभाव्य अपघातांचाही धोका वाढला आहे. हेही वाचा – LC Election: विधान परिषद निवडणूक जाहीर; काॅंग्रेस ‘या’ उमेदवाराला देणार पाठिंबा, हर्षवर्धन सपकाळ यांची माहिती या समस्येबाबत ग्रामपंचायत तसेच संबंधित प्रशासनाकडे अनेक वेळा पाठपुरावा करूनही कोणतीही ठोस कार्यवाही करण्यात आलेली नाही, असा आरोप ग्रामस्थांनी केला आहे. प्रशासनाच्या या कथित दुर्लक्षामुळे ग्रामस्थांमध्ये तीव्र नाराजी निर्माण झाली असून अखेर मतदानावर बहिष्कार टाकण्याचा निर्णय घेण्यात आला आहे. ग्रामस्थांनी प्रशासनाला दोन दिवसांचा अल्टिमेटम देत, संबंधित रस्त्यावरील खड्डे डांबरीकरण करून तातडीने बुजवावेत, अन्यथा मतदान प्रक्रियेत सहभागी होणार नसल्याचे स्पष्ट केले आहे. यासंदर्भात बारामतीच्या निवडणूक निर्णय अधिकाऱ्यांकडे अधिकृत निवेदन सादर करण्यात आले आहे. दरम्यान, ग्रामस्थांच्या या भूमिकेमुळे प्रशासनासमोर आव्हान उभे राहिले असून निवडणुकीपूर्वी रस्ता दुरुस्तीचा प्रश्न मार्गी लागतो का, याकडे सर्वांचे लक्ष लागले आहे.