Sant Tukaram Maharaj Palkhi –‘साधू संत येती घरा, तोची दिवाळी दसरा’ या उक्तीप्रमाणे जगद्गुरू संत श्री तुकाराम महाराजांच्या पालखी सोहळ्याचे आज, गुरुवारी (दि. १६) भवानीनगर (ता. इंदापूर) येथे मोठ्या उत्साहात आगमन होत आहे. या वैष्णवांच्या मेळ्याच्या स्वागतासाठी भवानीनगर येथील श्री छत्रपती सहकारी साखर कारखाना परिसर सज्ज झाला आहे. कारखान्याच्या वतीने पालखी दर्शन स्थळाची स्वच्छता करून भाविकांसाठी दर्शनाची चोख व्यवस्था करण्यात आल्याची माहिती कारखान्याचे अध्यक्ष पृथ्वीराज जाचक व उपाध्यक्ष शिवाजीराव निंबाळकर यांनी दिली.

दर्शन स्थळावर वारकऱ्यांना व भाविकांना धुळीचा त्रास होऊ नये, म्हणून कारखान्याच्या अग्निशामक दलाच्या बंबांद्वारे संपूर्ण परिसरावर पाणी साफ करण्यात आला आहे. कारखान्याच्या कार्यक्षेत्रात जागोजागी स्वागत कमानी उभारण्यात आल्या असून, पालखी मार्गावरील रस्ते झाडून स्वच्छ करण्यात आले आहेत. भवानीनगर येथे दर्शनासाठी पालखी विसावणार असल्याने, स्थानिक भाविकांना शिस्तीत आणि सुलभतेने दर्शन घेता यावे यासाठी बॅरिकेड्स लावून सुरक्षित दर्शन रांगांची उभारणी करण्यात आली आहे.

सणसर येथील मुक्कामस्थळी चोख व्यवस्था
भवानीनगर येथील विसाव्यानंतर पालखी सोहळा रात्रीच्या मुक्कामासाठी सणसर येथे मार्गस्थ होणार आहे. सणसरमधील मुक्कामस्थळ आणि पालखी ओट्याचा परिसर चकाचक करण्यात आला आहे. रात्रीच्या वेळी होणाऱ्या भजन-कीर्तनाचा लाभ भाविकांना व्यवस्थित घेता यावा, म्हणून बैठक व्यवस्था करण्यात आली आहे. पालखी ओट्यावर श्री संत तुकाराम महाराजांच्या पादुकांचे दर्शन घेण्यासाठी भाविकांना रांगेत उभे राहावे लागणार असून, यासाठी सणसर ग्रामपंचायत व स्थानिक प्रशासनाची यंत्रणा पूर्णपणे सज्ज असल्याची माहिती सरपंच यशवंत नरुटे यांनी दिली.