Sant Tukaram Maharaj Palkhi – पंढरपूरच्या विठुरायाच्या दर्शनासाठी मार्गस्थ झालेल्या जगद्गुरू श्री संत तुकाराम महाराजांच्या पालखी सोहळ्याचे बुधवारी दुपारी देहूरोड लष्करी परिसर, सीओडी, झेंडेमळा आणि चिंचोली येथे उत्स्फूर्त स्वागत करण्यात आले. भरपावसातही ‘ज्ञानोबा-तुकाराम’च्या अखंड जयघोषात लाखो वारकरी भक्तिरसात तल्लीन झाले होते. चिंचोली येथे दुपारच्या विसाव्यासाठी पालखी थांबताच पंचक्रोशीतील भाविकांनी दर्शनासाठी मोठी गर्दी केली.

चिंचोली येथील श्री शनैश्वर मंदिरासमोर पालखी रथाचे पुष्पवृष्टी करून स्वागत करण्यात आले. शनेश्वर देवस्थान समितीच्या वतीने संत तुकाराम महाराजांची आरती अध्यक्ष दत्तात्रय जाधव, सहायक पोलीस आयुक्त प्रवीण मोरे आणि पोलीस निरीक्षक विक्रम बनसोडे यांच्या हस्ते करण्यात आली. यावेळी देवस्थान समितीचे पदाधिकारी, सदस्य आणि ग्रामस्थ उपस्थित होते. ‘

ज्ञानोबा-तुकाराम’च्या अखंड नामगजरात चालणारे लाखो वारकरी दुपारच्या विसाव्यासाठी चिंचोली येथे थांबले असताना चिंचोली, किन्हई, कान्हेवाडी, किवळे, रावेत, विकासनगर, गहुंजे आणि परिसरातील गावांतील भाविकांनी दर्शनासाठी मोठी गर्दी केली. सकाळपासून सुरू असलेल्या संततधार पावसामुळे विसावा परिसर चिखलमय झाला होता. अनेक ठिकाणी पाणी साचल्याने वारकऱ्यांना भोजन आणि विश्रांतीसाठी काही अडचणींचा सामना करावा लागला.

तरीही वारकऱ्यांचा उत्साह आणि विठ्ठलनामाचा गजर अखंड सुरू होता. देहूरोड कॅन्टोन्मेंट हद्दीतील विरस्थळ चौक, झेंडेमळा आणि सीओडी डेपो परिसरातही पालखीचे उत्स्फूर्त स्वागत करण्यात आले. सीओडी प्रशासन, विविध कर्मचारी संघटना आणि ग्रामस्थांनी पालखीचे स्वागत करून वारकऱ्यांना शुभेच्छा दिल्या.

मुसळधार पावसात भिजत चालणारे वारकरी
“भाग गेला, शीण गेला; अवघा झाला आनंद”
या संत तुकाराम महाराजांच्या अभंगाचा प्रत्यय देत आनंदाने अभंग गात पुढे सरकत होते. यंदाच्या पालखी सोहळ्यात युवक-युवतींचा सहभाग लक्षणीय प्रमाणात वाढल्याचे चित्र दिसून आले. दुपारच्या विसाव्यानंतर पालखी पुन्हा मार्गस्थ होत देहूरोड येथे दाखल झाली. संत तुकाराम महाराज स्वागत प्रवेशद्वाराजवळ तुषार तरस, तरस परिवार आणि राजा शिवछत्रपती मराठा सोसायटीच्या वतीने पालखी रथावर पुष्पवृष्टी करून भावपूर्ण स्वागत करण्यात आले. देहूरोड, रावेत, किवळे, मामुर्डी, गहुंजे आणि मावळ परिसरातील हजारो भाविकांनी पालखीचे दर्शन घेत तुकोबांना भावपूर्ण अभिवादन केले.