Sant Tukaram Maharaj Palkhi – जगद्गुरू संत तुकाराम महाराजांच्या पालखी सोहळ्याचे इंदापूर तालुक्यातील सणसर येथे मुक्कामासाठी आगमन झाले आहे. यावेळी सणसरचे सरपंच, उपसरपंच, ग्रामपंचायतीचे सर्व सदस्य आणि ग्रामस्थांच्या वतीने पालखी सोहळ्याचे अत्यंत उत्साहात व भव्य स्वागत करण्यात आले. बारामती तालुक्यातील काटेवाडी येथील विसावा आवरून पालखी सोहळा इंदापूर तालुक्यातील भवानीनगर येथे आगमन होताच कृषीमंत्री दत्तात्रय भरणे यांनी पालखी रथाचे सारथ्य केले.

यावेळी ‘श्री छत्रपती’ साखर कारखान्याचे अध्यक्ष पृथ्वीराज जाचक, उपाध्यक्ष शिवाजीराव निंबाळकर आणि सणसरचे सरपंच यशवंत पाटील यांनी कारखान्याच्या वतीने पालखीचे भक्तिभावे स्वागत केले. यानंतर पालखी सोहळा श्री छत्रपती कारखान्याच्या कार्यस्थळावर विसाव्यासाठी थांबला. येथे कारखान्याचे संचालक निलेश टिळेकर व त्यांच्या पत्नी रश्मी टिळेकर यांनी माऊलींच्या पादुकांचे विधिवत पूजन केले. परिसरातील नागरिकांना व महिला भाविकांना दर्शन सुलभतेने घेता यावे, यासाठी कारखान्याकडून रांगेची सोय करण्यात आली होती.

यामुळे हजारो भाविकांनी शिस्तीत दर्शन घेतले. याप्रसंगी कारखान्याच्या वतीने पालखीतील वारकऱ्यांना बुंदीचे वाटप करण्यात आले. विसावा संपल्यानंतर हा पालखी सोहळा इरिगेशन (सिंचन) मार्गाने सणसर येथील मुक्कामस्थळी पोहोचला. सणसर आणि पंचक्रोशीतील भाविकांना तुकोबांच्या पादुकांचे सुलभतेने दर्शन घेता यावे, यासाठी मुक्कामाच्या ठिकाणी चोख व्यवस्था करण्यात आली आहे. पोलीस प्रशासनानेही चोख बंदोबस्त ठेवला असून, सर्व भाविक शांततेत व सुलभतेने दर्शनाचा लाभ घेत आहेत.