Sant Muktabai Palkhi – संतश्रेष्ठ मुक्ताबाईंच्या अखंड भक्तिपरंपरेचा वारसा जपत श्रीक्षेत्र शेळगाव (ता. इंदापूर) ते श्रीक्षेत्र पंढरपूर हा संत मुक्ताबाई पालखी सोहळा यंदा सलग आठव्या वर्षी भक्तिमय वातावरणात पार पडणार आहे. सोमवार, 20 जुलै ते रविवार, 26 जुलै या कालावधीत होणार्‍या पालखी सोहळ्याचे प्रस्थान सोमवार, 20 जुलै रोजी सकाळी 8 वाजता संत मुक्ताबाई देवस्थान, श्रीक्षेत्र शेळगाव येथून होणार असल्याची माहिती पालखी सोहळा प्रमुख तथा सुप्रसिद्ध कीर्तनकार हभप प्रकाश महाराज साठे यांनी दिली.

वारकरी संप्रदायातील नामभक्ती, संतपरंपरा, सामाजिक समता आणि अध्यात्मिक संस्कारांचा संदेश देणारा हा पालखी सोहळा पुणे जिल्ह्यासह परिसरातील वारकरी आणि भाविकांसाठी श्रद्धेचे महत्त्वाचे केंद्र बनला आहे. विठ्ठलनामाच्या अखंड गजरात, टाळ-मृदंगाच्या निनादात आणि हरिनामाच्या जयघोषात पालखी पंढरीच्या दिशेने मार्गक्रमण करणार आहे. यंदाच्या पालखी सोहळ्यात सहा मुक्काम निश्चित करण्यात आले आहेत.

पहिला मुक्काम काटेश्वर विद्यालय, काटी (ता. इंदापूर), दुसरा जिल्हा परिषद प्राथमिक शाळा व संत सावता माळी मंदिर, माळेवाडी (ता. माळशिरस), तिसरा जिल्हा परिषद शाळा, दसूर (ता. माळशिरस), चौथा माऊली कृषी फार्म हाऊस, भंडीशेगाव, तर पाचवा व सहावा मुक्काम रिद्धी-सिद्धी बहुउद्देशीय संस्था, पंढरपूर येथे होणार आहे. शेळगाव, सोनी, मोहा, बीड, पोरेवाडी, भरणेवाडी, कडबनवाडी तसेच इंदापूर तालुक्यातील असंख्य वारकरी,

भजनी मंडळे आणि विठ्ठलभक्त या पालखी सोहळ्यात सहभागी होणार असून संपूर्ण मार्गावर भक्ती, सेवा आणि समतेचा संदेश दिला जाणार आहे. पालखी सोहळ्यास माजी आमदार यशवंत माने, पुणे जिल्हा मध्यवर्ती सहकारी बँकेचे संचालक आप्पासाहेब जगदाळे तसेच कर्मयोगी शंकरराव पाटील सहकारी साखर कारखान्याचे संचालक वसंत आबा मोहोळकर यांचे विशेष सहकार्य लाभणार आहे.

पालखीसोबत नामसंकीर्तनाची सेवा ह.भ.प. प्रकाश महाराज साठे, संतोष महाराज वनवे, दीपक महाराज मेटे, नरसिंग महाराज मोरतळे, अक्षय महाराज पिंगळे, रवी महाराज पवार, अंकुश महाराज दराडे, बापूराव महाराज ठोंबरे आणि माऊली महाराज जाधव करणार आहेत. ह.भ.प. गजानन कृष्णा चवरे, मधुकर साधू शिंगाडे आणि नंदकुमार परशुराम झेंडे हे मानाचे विणेकरी म्हणून सेवा बजावतील.

श्रीरंग महाराज पोरे व अनिल महाराज गावडे चोपदार म्हणून, तर सोमनाथ रघुनाथ गोडसे आणि सुरेश मल्हारी ननवरे पालखी सेवेकरी म्हणून जबाबदारी सांभाळणार आहेत. यावेळी ह.भ.प. प्रकाश महाराज साठे यांनी पुणे जिल्ह्यातील वारकरी बांधवांना मोठ्या संख्येने पालखी सोहळ्यात सहभागी होण्याचे आवाहन केले.