Sanjay Raut : दिल्लीतील ऐतिहासिक रामलीला मैदानावर १ नोव्हेंबर रोजी काँग्रेसतर्फे आयोजित करण्यात आलेली महारॅली निश्चित केलेल्या दिवशीच पार पडणार आहे. दिल्लीतील व्यापारी आणि उद्योजकांची संघटना चेंबर ऑफ ट्रेड अँड इंडस्ट्रीने सणासुदीच्या काळात आंदोलन न करण्याचे पत्र देऊनही विरोधी पक्ष आपल्या आंदोलनावर ठाम आहेत.

शिवसेना (उद्धव बाळासाहेब ठाकरे) खासदार संजय राऊत (Sanjay Raut) यांनी प्रसारमाध्यमांशी बोलताना याला दुजोरा दिला आहे. सणासुदीचा काळ असल्याने या आंदोलनामुळे व्यापाऱ्यांचे मोठे नुकसान होण्याची शक्यता वर्तवली जात आहे. मात्र, यावर भाष्य करताना राऊतांनी केंद्र सरकार आणि भाजपवर घणाघाती टीका केली.

राऊत (Sanjay Raut) म्हणाले,सणांपेक्षा देश मोठा आहे. हे आंदोलन १ नोव्हेंबरलाच होईल, कारण राहुल गांधी यांनी ही तारीख निश्चित केली आहे. जे व्यापारी विरोध करत आहेत ते भाजपचे समर्थक आहेत. खरे व्यापारी तर नरेंद्र मोदी आणि अमित शहा आहेत; त्यांना स्वतःच्या शेअर बाजाराच्या नुकसानीची चिंता आहे, म्हणूनच ते असे बोलत आहेत. विरोधी पक्षांच्या या ठाम भूमिकेमुळे सणांच्या काळात दिल्लीत मोठे आंदोलन रंगणार असल्याचे आता स्पष्ट झाले आहे.