Sanjay Raut : शिवसेना (उद्धव बाळासाहेब ठाकरे) गटाचे नेते संजय राऊत यांनी विधानसभा अध्यक्ष राहुल नार्वेकर यांच्यावर गंभीर आरोप केले आहेत. पदाचा गैरवापर करून रायगड जिल्ह्यातील जमिनी गुजरातमधील उद्योगपतींना मिळवून दिल्या जात असल्याचा दावा राऊत यांनी केला आहे. या प्रकरणाचा सविस्तर खुलासा लवकरच करणार असल्याचेही त्यांनी म्हटले आहे. त्यांच्या या वक्तव्यामुळे राजकीय वर्तुळात खळबळ उडाली आहे.

राहुल नार्वेकरांवर राऊतांचा गंभीर आरोप

संजय राऊत यांनी केलेल्या आरोपांनुसार, रायगड जिल्ह्यातील जमिनी गुजरातमधील उद्योगपतींच्या फायद्यासाठी मिळवून देण्याचे प्रयत्न सुरू आहेत. याविरोधात अलिबाग तालुक्यात कातकरी समाज आंदोलन करत असून, सामाजिक कार्यकर्त्या उल्का महाजन या आंदोलनाचे नेतृत्व करत आहेत, असे राऊत यांनी सांगितले.

आदिवासी आणि शेतकऱ्यांच्या जमिनींच्या प्रश्नावरून त्यांनी सरकारवरही टीका केली. महाराष्ट्रातील मराठी माणसाच्या जमिनी किती घेतल्या जाणार, असा सवाल करत त्यांनी या प्रकरणाची माहिती योग्य वेळी समोर आणणार असल्याचे जाहीर केले.

दरम्यान, राऊत यांनी केलेल्या आरोपांवर राहुल नार्वेकर यांची प्रतिक्रिया अद्याप समोर आलेली नसून, ते यावर काय भूमिका मांडतात, याकडे लक्ष लागले आहे.

कर्जतमधील वृक्षतोडीवरूनही संजय राऊत आक्रमक

रायगडमधील जमिनींच्या मुद्द्यासोबतच कर्जत परिसरातील वृक्षतोडीवरूनही संजय राऊत चांगलेच आक्रमक झाल्याचे पाहायला मिळाले. झाडांच्या संवर्धनासाठी सरकारकडून दिल्या जाणाऱ्या संदेशांचा उल्लेख करत त्यांनी सत्ताधाऱ्यांवर निशाणा साधला. राऊत म्हणाले “2503 झाडं तोडली आहेत. 33 हजार झाडं पहिल्या टप्प्यातील तोडणार आहेत. म्हणजे हे साई जंगल नष्ट करणार आहेत. इथून भीमाशंकर जवळच आहे. या जंगलात आदिवासी राहतात. मोदी म्हणतात एक पेड माँ के नाम. कुणाची माँ? कातकऱ्यांनीच लावलेली ही झाडं आहेत. त्यांना आई नाही का? आई फक्त भाजपलाच आहे का?

२०० वर्षांची झाडे तोडून रोपटी लावणार?

वृक्षतोडीच्या बदल्यात अन्य ठिकाणी झाडे लावली जाणार असल्याचे सांगितले जात असल्याच्या पार्श्वभूमीवर राऊत यांनी त्यावर आक्षेप घेतला. दोनशे वर्षे जुनी झाडे तोडून दुसरीकडे रोपटी लावल्याने पर्यावरणाची झालेली हानी भरून निघणार का, असा सवाल त्यांनी उपस्थित केला. ही झाडे लावण्यासाठी जागा कुठे उपलब्ध आहे, अशी विचारणाही त्यांनी केली. याशिवाय थेट पर्यावरण मंत्रालयाच्या कार्यपद्धतीवर टीका करत त्यांनी मंत्रालय रद्द करण्याची मागणी केली.

Nevasa : भालगाव-गोधेगाव परिसरात बिबट्याची दहशत कायम! हल्ल्यात १२ वर्षीय मुलगा थोडक्यात बचावला