मुंबई – यंदाचं हिवाळी अधिवेशन चांगलंच वादळी ठरलं. विरोधकांनी एकीकडे मुख्यमंत्र्यांच्या राजीनाम्याची मागणी केली तर दुसरीकडे उपमुख्यमंत्री देवेंद्र फडणवीस यांची कोंडी करण्याचा प्रयत्न केला होता. अधिवेशनाच्या चौथ्या दिवसाचं कामकाज सुरू होण्यापूर्वीच विरोधक जोरदार आक्रमक झाले होते. यावेळी विरोधी पक्षाच्या आमदारांनी विधानसभेच्या पायरीवर येऊन जोरदार घोषणाबाजी करत राज्य सरकारला धारेवर धरलं.

यावेळी खासकरून भूखंड घोटाळ्यावरून विरोधकांनी थेट मुख्यमंत्री एकनाथ शिंदे यांनाच घेरलं. विरोधकांनी हातात श्रीखंडाचे डब्बे घेऊन भूखंडाचे ‘श्रीखंड खाल्ले कुणी? मुख्यमंत्र्यांनी… मुख्यमंत्र्यांनी…’ अशा घोषणाच दिल्या होत्या. दरम्यान, याच मुद्द्यावरून आता शिंदे गटाचे आमदार संजय शिरसाट यांनी ठाकरे गटावर जोरदार टीकास्त्र सोडले आहे. तसेच, ठाकरे गटाचे खासदार संजय राऊत यांचा देखील चांगलाच समाचार घेतला आहे.

‘जेव्हा एकनाथ शिंदे शिवसेनेत होते तेव्हा तुमची सत्ता होती तेव्हा तुम्ही कोणत्याही गोष्टींची चौकशी केली नाही. उलट एकनाथ शिंदे यांना त्रास दिला आज राज्यात त्यांचं सरकार असून, सर्व काम व्यवस्थित रित्या सुरू आहे. म्हणून तुम्ही रिकामे आरोप करत असल्याचं संजय शिरसाट यांनी म्हटलं आहे.

संजय शिरसाट पुढे म्हणाले, ‘सध्या उद्धव ठाकरेंची शिवसेना ही राष्ट्रवादी काँग्रेस चालवत आहे. खासदार संजय राऊत हे शिवसेनेचे नाही तर शरद पवारांच्या राष्ट्रवादी काँग्रेसचे प्रवक्ते आहेत. ज्या दिवशी शिवसेना संपेल त्या दिवशी संजय राऊत हे शरद पवारांच्या मांडीवर बसलेले दिसतील’. असं देखील ते म्हणाले.

उद्धव ठाकरे यांनी केली एकनाथ शिंदेंच्या राजीनाम्याची मागणी…

उद्धव ठाकरे यांनी देखील एकनाथ शिंदे यांच्या राजीनाम्याची मागणी केली आहे. आम्ही त्यांच्यावर आरोप केलेला नाही तर थेट न्यायालयाने सुओ मुटो घेऊन म्हणजे स्वतः पुढाकार घेऊन या प्रकरणाची दखल घेतली आहे. प्रकरण न्यायप्रविष्ठ असताना मुख्यमंत्र्यांनी पदावर राहणे योग्य नाही. असे उद्धव ठाकरे म्हणाले.