Sharad Pawar Health Update : राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांना पुन्हा एकदा रुग्णालयात दाखल करण्यात आले आहे. मुंबईतील ब्रीच कँडी रुग्णालयात त्यांना पुढील तपासणीसाठी दाखल करण्यात आल्याची माहिती खासदार सुप्रिया सुळे यांनी दिली आहे.

दरम्यान, शरद पवार यांना सोमवारी कफाचा त्रास जाणवू लागल्याने पुण्यातील रूबी रुग्णालयात दाखल करण्यात आले होते. तेथे उपचार घेतल्यानंतर त्यांच्या प्रकृतीत सुधारणा झाली होती. त्यामुळे त्यांना आज सकाळीच रुग्णालयातून डिस्चार्ज देण्यात आला होता. मात्र, आता पुढील वैद्यकीय तपासणीसाठी त्यांना मुंबईतील ब्रीच कँडी रुग्णालयात दाखल करण्यात आले आहे.

सुप्रिया सुळे यांनी सोशल मीडियाद्वारे शरद पवार हे रुग्णालयात दाखल झाल्याची माहिती दिली. त्यांना पुढील तपासणीसाठी ब्रीच कँडी रुग्णालयात नेण्यात आल्याचे त्यांनी स्पष्ट केले आहे. त्यांच्या प्रकृतीबाबत अधिक तपशील अद्याप समोर आलेला नाही.

पंतप्रधान मोदींकडून प्रकृतीची विचारपूस –

दरम्यान, शरद पवार यांना पुण्यातील रूबी रुग्णालयातून डिस्चार्ज मिळाल्यानंतर पंतप्रधान नरेंद्र मोदी यांनी त्यांना फोन केला होता. यावेळी मोदी यांनी त्यांच्या प्रकृतीची विचारपूस केली. तसेच, तब्येतीची काळजी घेण्याचा आणि पुरेशी विश्रांती घेण्याचा सल्लाही दिला होता. आता पुढील तपासणीसाठी शरद पवार यांना पुन्हा रुग्णालयात दाखल करण्यात आल्याने त्यांच्या प्रकृतीकडे राजकीय वर्तुळाचे लक्ष लागले आहे.