Sachin Khilari Breaks Games Record Wins Gold as India Sweeps F46 Shot Put in Asian Para Games : जपानमधील नागोया येथे सुरू असलेल्या आशियाई पॅरा गेम्स २०२६ मध्ये बुधवारी भारतीय ॲथलीट्सनी आपल्या ऐतिहासिक कामगिरीने मैदान गाजवले. पॅरिस पॅरालिम्पिकमधील रौप्यपदक विजेता सचिन सर्जेराव खिलारी याने पुरुषांच्या गोळाफेक (शॉट पुट) एफ४६ प्रकारात सुवर्णपदक जिंकत आपल्या मागील विजेतेपदाचा यशस्वी बचाव केला. विशेष म्हणजे या क्रीडा प्रकारात भारताने तिन्ही पदकांवर नाव कोरत ऐतिहासिक ‘क्लीन स्वीप’ केला. याशिवाय महिलांच्या गटात भाग्यश्री जाधव आणि पॅरा पॉवरलिफ्टिंगमध्ये कस्तुरी राजमणी यांनी रौप्यपदके जिंकून भारताच्या खात्यात मोलाची भर घातली.

सचिनचा शेवटच्या प्रयत्नात १५.८७ मीटरचा नवा गेम्स रेकॉर्ड –

महाराष्ट्रातील आटपाडी तालुक्यातील करगणीचा सुपुत्र सचिन खिलारीने पहिल्या पाच प्रयत्नांनंतर आपल्या सहाव्या आणि अंतिम प्रयत्नात १५.८७ मीटरचा अप्रतिम थ्रो करत सुवर्णपदकावर मोहर उमटवली. यासह त्याने १५.६७ मीटरचा जुना गेम्स रेकॉर्ड मोडीत काढत नवा इतिहास रचला. याच प्रकारात भारताच्या मोहम्मद यासीरने १५.०६ मीटर थ्रो करत रौप्यपदक पटकावले, तर परवीनने १४.९४ मीटर अंतरासह कांस्यपदक मिळवले. महिलांच्या शॉट पुट एफ३४ प्रकारात भाग्यश्री जाधवने ८.१९ मीटरच्या वैयक्तिक सर्वोत्तम कामगिरीसह भारताला रौप्यपदक मिळवून दिले.

काय आहे गोळाफेकमधील एफ४६ वर्गवारी?

पुरुषों की शॉट पुट F46 स्पर्धा में सचिन खिलारी जी ने 15.87 मीटर के सीज़न बेस्ट प्रदर्शन के साथ स्वर्ण, मोहम्मद यासर जी ने 15.06 मीटर के साथ रजत और प्रवीण जी ने 14.94 मीटर के साथ कांस्य पदक जीतकर तिरंगे का मान बढ़ाया। तीनों खिलाड़ियों को इस शानदार सफलता के लिए हार्दिक बधाई।

#Cheer4Bharat #AsianParaGames2026

— Parvesh Sahib Singh (@p_sahibsingh) October 21, 2026

पॅरा ॲथलेटिक्समधील एफ४६ ही वर्गवारी अशा खेळाडूंसाठी राखीव असते ज्यांच्या हातामध्ये किंवा शरीराच्या वरील अवयवांमध्ये जन्मतः अथवा अपघातामुळे दिव्यांगत्व आलेले असते. कोपराच्या वर किंवा खालून हात नसलेले खेळाडू या श्रेणीत उभे राहून स्पर्धा करतात. हाताची ताकद मर्यादित असल्याने हे खेळाडू गोळा फेकताना जास्तीत जास्त ऊर्जा आणि गती निर्माण करण्यासाठी कंबर आणि पायांच्या ताकदीचा अचूक समन्वय साधतात.

कस्तुरी राजमणीचे पॉवरलिफ्टिंगमध्ये १०८ किलो वजन उचलून रौप्यपदक –

KASTHURI RAJAMANI WINS SILVER IN PARA POWER LIFTING AT ASIAN PARA GAMES! 🥈 https://t.co/o7xZCflbnt

— The Khel India (@TheKhelIndia) October 21, 2026

दुसरीकडे पॅरा पॉवरलिफ्टिंग कोर्टवर तमिळनाडूच्या कस्तुरी राजमणी हिने महिलांच्या ६७ किलो वजनी गटात रौप्यपदक जिंकून देशाची मान अभिमानाने उंचावली. कस्तुरीने आपल्या तिसऱ्या आणि अंतिम प्रयत्नात १०८ किलो वजन यशस्वीपणे उचलून दुसरे स्थान पटकावले. दक्षिण कोरियाच्या किम ह्योंग-हुईने १०७ किलोसह कांस्यपदक मिळवले, तर उझबेकिस्तानच्या रुखशोना उक्तामोवाने १२७ किलो वजन उचलून सुवर्णपदक जिंकले. चालू स्पर्धेत भारताचे पॉवरलिफ्टिंगमधील हे दुसरे पदक ठरले असून यापूर्वी अशोक कुमार मलिकने ६५ किलो गटात रौप्यपदक पटकावले होते.

हेही वाचा – Mohammed Shami Statement : “माझ्याशी कोण आणि का बोलेल?” न्यूझीलंड दौऱ्यातून पत्ता कट झाल्यानंतर मोहम्मद शमीचे मोठे वक्तव्य, पाहा VIDEO

पोलिओवर मात करत कस्तुरीचा प्रेरणादायी संघर्ष –

४२ वर्षीय कस्तुरीचा क्रीडा क्षेत्रातील प्रवास अत्यंत संघर्षमय आणि प्रेरणादायी राहिला आहे. दोन्ही पायांना पोलिओ जडलेला असताना आणि लहानपणीच आईचे छत्र हरपलेले असताना आजीने तिचा सांभाळ केला. सर्व आर्थिक आणि शारीरिक अडचणींवर मात करत तिने आंतरराष्ट्रीय स्तरावर देशाचा तिरंगा फडकवला. भारतीय पॅरा ॲथलीट्सच्या या अफाट जिद्दीमुळे आशियाई पॅरा गेम्सच्या पदक तालिकेत भारताचा दबदबा आणखी मजबूत झाला आहे.