SA vs AUS 2nd ODI Quinton De Kock Fights With Captain Temba Bavuma DRS Video : दक्षिण आफ्रिका आणि ऑस्ट्रेलिया यांच्यातील दुसऱ्या एकदिवसीय सामन्यादरम्यान मैदानावर एक धक्कादायक प्रकार समोर आला आहे. दक्षिण आफ्रिकेचा यष्टीरक्षक-फलंदाज क्विंटन डिकॉक (Quinton de Kock) थेट स्वतःच्याच संघाचा कर्णधार टेम्बा बावुमाशी (Temba Bavuma) भर मैदानात भिडला. डीआरएस (DRS) घेण्याच्या निर्णयावरून दोघांमध्ये जोरदार शाब्दिक चकमक उडाली. या वादाचा व्हिडीओ सोशल मीडियावर तुफान व्हायरल झाला असून क्रिकेटविश्वात मोठी खळबळ उडाली आहे.

डीआरएसवरून डिकॉक ओरडला; बावुमाने सुनावले, यानसेनने वाद मिटवला!

सामन्यादरम्यान दक्षिण आफ्रिकेचा गोलंदाज लिझार्ड विल्यम्सचा एक चेंडू ऑस्ट्रेलियन फलंदाज झेवियर बार्टलेटच्या पॅडवर लागला. दक्षिण आफ्रिकेच्या जोरदार अपीलनंतर पंचांनी बाद दिले नाही, ज्यामुळे डिकॉक अस्वस्थ झाला आणि थेट बावुमावर ओरडू लागला. बावुमाने डिकॉकला शांत राहण्याचा इशारा देत, निर्णय घेण्यासाठी विचार करत असताना अंगावर ओरडणे योग्य नाही, असे सुनावले. वाद वाढताना पाहून अष्टपैलू मार्को यानसेनने तातडीने मध्यस्थी करत डिकॉकला शांत केले.

सोशल मीडियावर चाहत्यांमध्ये संताप; उमटल्या संमिश्र प्रतिक्रिया!

The exchange between Temba Bavuma and de Kock. He has to respect Bavuma as a captain. pic.twitter.com/zo8KBKNiNA

— Ngqanga Nentsiba Zayo (@Intengu_drongo) September 27, 2026

या घटनेचा व्हिडीओ समोर आल्यानंतर सोशल मीडियावर चाहत्यांनी डिकॉकच्या आक्रमक वागणुकीवर तीव्र नाराजी व्यक्त केली आहे. कर्णधाराचा असा भर मैदानात अपमान करणे अत्यंत चुकीचे असल्याचे काहींनी म्हटले, तर काहींनी दबावाच्या क्षणी मैदानात अशा गोष्टी घडणे स्वाभाविक असल्याचे सांगत त्याची बाजू सावरून धरली.

हेही वाचा – Vithya Ramraj Bronze : ट्रक ड्रायव्हरच्या लेकीने आशियाई स्पर्धेत रचला इतिहास! पीटी उषाचा ४२ वर्षे जुना विक्रम मोडत पदकावर कोरलं नाव

मिलरचे वादळी शतक, बावुमाची शतकी खेळी; दक्षिण आफ्रिकेने जिंकली मालिका!

या वादाव्यतिरिक्त दक्षिण आफ्रिकेने दुसरा सामना ३२ धावांनी जिंकून तीन सामन्यांच्या मालिकेत २-० अशी विजयी आघाडी घेतली. दक्षिण आफ्रिकेने ९ बाद ३६५ धावांचा डोंगर उभारला होता; ज्यात डेव्हिड मिलरने अवघ्या ९३ चेंडूंत १४२ आणि कर्णधार बावुमाने १०३ धावांची शतकी खेळी साकारली होती. प्रत्युत्तरादाखल ऑस्ट्रेलियाचा डाव ३३३ धावांवर आटोपला.