S. Jaishankar – भारताची सुरक्षा आणि भौगोलिक एकात्मता धोक्यात होती, तेंव्हा बहुतेक सर्व जग पाकिस्तानच्या लष्करी राजवटीच्या बाजूने असताना रशिया भारताच्या बाजूने उभा राहिला होता, असे परराष्ट्र मंत्री एस जयशंकर यांनी म्हटले आहे. म्युनिक लीडरशीप मीटिंगमध्ये ते बोलत होते.

भारतआणि रशियादरम्यान १९५० पासून सक्षम द्विपक्षीय संबंध आहेत. दोन्ही देशांमधील संबंधांना तेंव्हापासूनच्या संबंधांचा वारसा आहे. भारताच्या सुरक्षेला आणि भौगोलिक एकात्मतेला धोका होता, तेंव्हा तत्कालिन सोव्हिएत रशियाने भारताला पाठिंबा दिला होता. आज हे संबंध अधिक विस्तारलेले आहेत. आता हे संबंध आर्थिक संबंधांमध्येही रुपांतरित झाले आहेत, असेही जयशंकर म्हणाले.

उदयोन्मुख आणि मध्यम शक्ती या जागतिक दक्षिण आणि जागतिक उत्तर भागातील आहेत. त्या अधिक प्रभावी बनण्याच्या ध्येयाने एकत्र आल्या आहेत.

जग बदलत आहे, त्याचा अजेंडा आणि स्वरूप बदलत आहे, आणि उदयोन्मुख व मध्यम शक्तींनी सहकार्य करण्यासाठी एक महत्त्वपूर्ण अजेंडा आहे, असेही जयशंकर यांनी निदर्शनास आणून दिले.

आंतरराष्ट्रीय शांतता आणि सुरक्षा, पुरवठा साखळीची लवचिकता आणि संपर्क व्यवस्था हे उदयोन्मुख आणि मध्यम शक्तींसाठी महत्त्वाचा अजेंडा आहे, याकडेही त्यांनी लक्ष वेधले.