Rupali Thombare on Nishikant Dubey : भाषेच्या मुद्द्यावरून महाराष्ट्रात राजकीय वातावरण चांगलेच तापले आहे. मिरा-भाईंदरमधील एका व्यापाऱ्याला मराठी भाषेच्या मुद्द्यावरून झालेल्या मारहाणीच्या घटनेने देशभरात खळबळ उडाली आहे. याच प्रकरणावरून झारखंडमधील भाजप खासदार निशिकांत दुबे यांनी मराठी माणसांविरोधात चिथावणीखोर वक्तव्य करत, “महाराष्ट्राबाहेर या, आपटून मारू,” असा इशारा दिला आहे.

या वक्तव्याने आता महाराष्ट्रातील राजकीय नेते संतप्त झाले असून, अजित पवार गटाच्या नेत्या रुपाली ठोंबरे पाटील यांनी दुबे यांना सणसणीत प्रत्युत्तर देत, “महाराष्ट्रात आलात तर चपलेचा प्रसाद देईन,” असा थेट इशारा दिला आहे.

वादाचं मूळ कारण काय?

भाजप खासदार निशिकांत दुबे म्हणाले की, महाराष्ट्र आमच्या पैशावर जगतोय. तुम्ही कोणता कर भरता? तुमच्याकडे कोणता उद्योग आहे? खाण आमच्याकडे आहे. बिहार, झारखंड, मध्य प्रदेश, ओडीसाकडे आहे. रिफायनरी रिलायन्सने बसवलीय ती गुजरातमध्ये आहे. सेमी कंडक्टर्सची इंडस्ट्री गुजरातमध्ये आहे. तुमच्याकडे काही नसताना वरून तुम्ही आमचे शोषण करून कर भरताय, असं दुबे म्हणाले.

पुढे म्हणाले की, हिंदी भाषिक लोकांना मारताय तर उर्दू, तमिळ, तेलगु भाषिकांनाही मारा. तुम्ही घाणेरडं कृत्य करताय. मी मराठीचा सन्मान करतो, छत्रपती शिवाजी महाराज, छत्रपती संभाजी महाराज यांचा सन्मान करतो. भारताला स्वातंत्र्य मिळवून देण्यात महाराष्ट्राचा खूप मोठा सहभाग आहे. परंतु आता महानगरपालिकेच्या निवडणुका आहेत, म्हणून घाणेरडं राजकारण सुरु आहे, असंही दुबे यांनी म्हटलं आहे.

तुम्ही खरंच बाळासाहेब ठाकरेंचे वारसदार असाल, तर तुमच्या जवळील माहीम दर्गावर जावं आणि तेथील उर्दु भाषिकांना मारुन दाखवा. तसेच तुमच्या घरात सिंह असतो, असं तुम्ही म्हणता, मग हिंमत असेल तर बिहार, तामिळनाडू, उत्तर प्रदेशात या. महाराष्ट्राबाहेर पडा, आम्ही तुम्हाला आपटून आपटून मारू आणि दाखवून देऊ, असा इशारा निशिकांत दुबे यांनी दिला होता. यावर आता रुपाली पाटील यांनी जोरदार पलटवार केला आहे.

रुपाली ठोंबरे यांचा आक्रमक पवित्रा

अजित पवार गटाच्या नेत्या रुपाली ठोंबरे पाटील यांनी निशिकांत दुबे यांच्या वक्तव्याचा तीव्र निषेध केला. त्या म्हणाल्या, “दुबे हे आमच्या मित्रपक्षाचे खासदार असले तरी मराठीबद्दल बेताल बोलण्याचा त्यांना अधिकार नाही. तुम्ही तुमची भाषा झारखंडमध्ये वापरा, महाराष्ट्रात नाही. मराठी माणूस बाहेर का जाईल? परप्रांतीयांनी महाराष्ट्रात यावं, मराठी शिकावं आणि मराठी भाषेचा आदर करावा.”

ठोंबरे यांनी पुढे थेट इशारा देत म्हटले, “दुबे यांनी मराठी माणसांबद्दल असभ्य बोलणं बंद करावं आणि दिलगिरी व्यक्त करावी. नाहीतर महाराष्ट्रात आल्यावर त्यांना चपलेचा प्रसाद मिळेल. भाजपने अशा नेत्यांना आवर घालावा, नाहीतर बिस्तारा गुंडाळून निघावं.” त्यांनी दुबे यांच्यावर जोरदार टीका करत, “तुझ्या राज्यात येऊन मराठी माणूस तुला आपटू शकतो,” असेही सुनावले.

दुबे यांना तुडवायचं की तुडवून घ्यायचं या : सुषमा अंधारे

निशिकांत दुबे यांच्या वक्तव्याने महाराष्ट्रातील राजकीय वातावरण ढवळून निघाले आहे. शिवसेना (उबाठा) नेत्या सुषमा अंधारे यांनीही भाजप नेत्यांना लक्ष्य करत, “दुबे यांना तुडवायचं की त्यांच्याकडून तुडवून घ्यायचं, हे ठरवा,” असा टोला लगावला. दुसरीकडे, सामान्य मराठी माणसांमध्येही संतापाची लाट उसळली आहे. एका X वापरकर्त्याने लिहिले, “मराठी माणसाचा हिंदीला विरोध नाही, पण निशिकांत दुबे यांच्यासारख्या माज दाखवणाऱ्या वृत्तीला विरोध आहे.”