पुणे : पुण्यातील दीनानाथ मंगेशकर रुग्णालयामध्ये पैशांमुळे योग्य वेळेत उपचार न मिळाल्याने गर्भवती महिलेच्या मृत्यूप्रकरणी शहरात संतापाची लाट उसळल्याचं चित्र दिसून येत आहे. या प्रकरणाच्या चौकशीसाठी समिती देखील नेमण्यात आलेली आहे. तर या समितीच्या विरोधात काही आक्षेप उपस्थित झाले आहेत. याप्रकरणी आता महिला आयोगाचे अध्यक्ष रूपाली चाकणकर यांनी भिसे कुटुंबाची भेट घेतली आहे. यावेळी भिसे कुटुंबीयांनी राज्य महिला आयोगाच्या अध्यक्षा रूपाली चाकणकर यांना एक पत्र दिले आहे. या पत्रात डॉ. घैसास यांच्यामुळेच गर्भवती महिलेचा जीव गेल्याचा आरोप भिसे कुटुंबीयांनी केला आहे. तसेच डॉ घैसास यांच्यावर सदोष मनुष्यवधाचा गुन्हा दाखल करण्याची मागणी देखील नातेवाईकांनी या पत्रातून केली आहे. खाजगी बाब जगजाहीर करत आमची बदनामी : भिसे कुटुंब तसेच दीनानाथ मंगेशकर रुग्णालयाने अंतर्गत समितीचा चौकशी अहवाल जाणून बुजून माध्यमांसमोर आणत आमची आणि मृत महिलेची बदनामी केली. रुग्णालयाने खाजगी बाब अहवालातून जगजाहीर करत आमची बदनामी केल्याप्रकरणी रुग्णालयावर कारवाई करण्याची मागणी देखील भिसे कुटुंबीयांनी रुपाली चाकणकर यांच्याकडे केली आहे. चाकणकर यांनी भिसे कुटुंबीयांचे पत्र स्वीकारलं असून सविस्तर माहिती घेऊन दोषींवर कठोर कारवाई करण्यासाठी प्रयत्न करणार असे, आश्वासन भिसे कुटुंबाना दिले आहे. रुपाली चाकणकर म्हणाल्या, दिनानाथ मंगेशकर रुग्णालयाची घटना घडली त्याचे पडसाद संपूर्ण महाराष्ट्रात उमटताना दिसत आहेत. आरोग्य सुविधा ही मूलभूत अशी गरज आहे, नागरिकांना धर्मादाय संस्थांनी चांगल्या पद्धतीची आरोग्य सुविधा देण अपेक्षित असताना आणि तशी नियमावली असताना रुग्णाला त्यांनी उपचार देण्यासाठी टाळाटाळ केली. यामुळे रुग्णाचा मृत्यू झाला. पेशंटच्या गोपनीय गोष्टी जाहीर केल्या ते अत्यंत चुकीचं पुढे बोलताना म्हणाल्या, रुग्ण आणि डॉक्टर यांच्यामध्ये झालेली चर्चा ही गोपनीय असते पण रुग्णालयाने स्वतःला वाचवण्यासाठी अहवाल सोशल मीडियाच्या माध्यमातून प्रसिद्ध केला आहे. आणि त्यामध्ये रुग्णाच्या बऱ्याच गोपनीय गोष्टी जाहीर केल्या आहेत. हे अत्यंत चुकीचं आहे. रुग्णालयाने ज्या गोष्टी समिती समोर मांडायला हव्या होत्या, त्या सोशल मीडियाच्या माध्यमातून मांडल्या. रुग्णालयाला मी कडक समज देते, असं राज्य महिला आयोगाच्या रुपाली चाकणकर म्हणाल्या. राज्य महिला आयोगाने घेतली गंभीर दाखल दिनानाथ मंगेशकर रुग्णालय गर्भवती मृत्यू प्रकरणाची राज्य महिला आयोगाने गंभीर दाखल घेतली असून आरोग्य विभागाचा अहवाल सादर करण्यासाठी पुणे पोलीस आयुक्तालयामध्ये बैठक बोलवण्यात आली आहे. रूपाली चाकणकर यांच्या अध्यक्षतेखाली ही बैठक होत असून, आरोग्य उपसंचालक व पोलिस आयुक्त या बैठकीला उपस्थित आहेत. या बैठकीत संबंधित राज्याच्या वतीनेची समिती नेमण्यात आलेली आहे. या समितीने तयार केलेला अहवाल यावेळी सादर केला जाणार आहे. शिवाय पोलिसांनी जो जबाब नोंदवला आहे, त्यात जबाबावर देखील चर्चा केली जाणार आहे. दीनानाथ मंगेशकर रुग्णालयामध्ये झालेल्या गर्भवतीच्या मृत्यूप्रकरणी ही बैठक महत्त्वपूर्ण असणार आहे.
