Rupali Chakankar : ज्येष्ठ अभिनेते नाना पाटेकर यांच्या निधनाने मनोरंजनसृष्टीसह सर्वच क्षेत्रातून हळहळ व्यक्त केली जात आहे. वयाच्या ७५व्या वर्षी हृदयविकाराच्या झटक्याने त्यांचे निधन झाले. पुण्यातील त्यांच्या मूळ गावी डोणजे येथे आज सायंकाळी चार वाजता त्यांच्या पार्थिवावर अंत्यसंस्कार करण्यात येणार आहेत.

नाना पाटेकर यांच्या निधनानंतर अनेक कलाकार, राजकीय नेते आणि त्यांच्या चाहत्यांकडून सोशल मीडियाच्या माध्यमातून श्रद्धांजली वाहिली जात आहे. महिला आयोगाच्या माजी अध्यक्षा रुपाली चाकणकर यांनीही नाना पाटेकरांना श्रद्धांजली अर्पण करत भावुक पोस्ट शेअर केली आहे.

रुपाली चाकणकर यांनी आपल्या पोस्टमध्ये नाना पाटेकर आता आपल्यात नाहीत, ही बाब स्वीकारणं मनासाठी अत्यंत क्लेशदायक असल्याचं म्हटलं आहे. गेल्या काही दिवसांत घडलेल्या घटनांमध्ये सर्वात आधी नाना पाटेकर यांचाच फोन आल्याची आठवण त्यांनी सांगितली.

‘अतिशय मायेने आणि आपुलकीने ते माझी चौकशी करायचे. स्वतःची काळजी घे, असं ते आवर्जून सांगायचे,’ अशा शब्दांत रुपाली चाकणकर यांनी नानांसोबतच्या आठवणींना उजाळा दिला.

ज्येष्ठ अभिनेते नाना पाटेकर यांच्या निधनाचे वृत्त अतिशय धक्कादायक आहे.

गेल्या काही दिवसांत घडलेल्या घटनांमध्ये मला सर्वात अगोदर जर कुणाचा फोन आला असेल तर तो नाना पाटेकर यांचा होता.अतिशय मायेने आणि आपुलकीने ते चौकशी करायचे,स्वतःची काळजी घे असे आवर्जून सांगायचे.आयुष्यात अशी खूप कमी संवेदनशील माणसं असतात की ज्यांना समाजाच्या वेदना समजतात नाना हे त्या पैकी एक होते.

अभिनयाच्या माध्यमातून लाखो मनांवर अधिराज्य गाजवणारे आणि ‘नाम फाउंडेशन’च्या माध्यमातून शेतकरी व गरजूंच्या मदतीसाठी आयुष्य झोकून देणारे संवेदनशील व्यक्तिमत्त्व नाना आज आपल्यात नाही,ही गोष्ट स्वीकारणे मनासाठी देखील क्लेशदायक आहे.

कलाक्षेत्रातील त्यांचे अतुलनीय योगदान आणि समाजासाठी त्यांनी केलेले कार्य सदैव स्मरणात राहील.
त्यांच्या जाण्याने मराठी आणि भारतीय कलाक्षेत्राची मोठी हानी झाली आहे.

नाना पाटेकर यांना भावपूर्ण श्रद्धांजली!

#nanapatekar

— Rupali Chakankar (@ChakankarSpeaks) October 8, 2026

या पोस्टसोबत त्यांनी नाना पाटेकर यांच्यासोबतचे काही फोटोही शेअर केले आहेत. नाना पाटेकर दरवर्षी आपल्या घरी मोठ्या उत्साहात गणेशोत्सव साजरा करत असयाचे. त्यांच्या घरच्या गणपतीच्या दर्शनासाठी विविध क्षेत्रातील मान्यवर आवर्जून उपस्थित राहायचे. यंदाही त्यांनी मोठ्या उत्साहात गणेशत्सव साजरा केला. रुपाली चाकणकर यांनीही नाना पाटेकर यांच्या घरी जाऊन गणपतीचं दर्शन घेतलं होतं. त्यांनी सोशल मीडियावर शेअर केलेला फोटो याच भेटीचा असल्याचं सांगितलं आहे.

Nana Patekar Dialogues: क्रांतिवीर ते नटसम्राट! नाना पाटेकरांचे हे 10 दमदार डायलॉग आजही प्रेक्षकांच्या मनात