पुणे : प्रोग्रेसिव्ह एज्युकेशन सोसायटीचे मॉडर्न कॉलेज ऑफ फिजिओथेरपी आणि रुबी हॉल क्लिनिक यांच्या संयुक्त विद्यमाने जागतिक हृदय दिनानिमित्त शनिवार, दि. २८ सप्टेंबर, २०२४ रोजी संस्थेच्या शिवाजीनगर येथील सभागृहात ‘हृदयदान जनजागृती’ या कार्यक्रमाचे आयोजन करण्यात आले होते. या कार्यक्रमास प्रोग्रेसिव्ह एज्युकेशन सोसायटीचे मा. कार्याध्यक्ष प्रा. डॉ. गजानन र. एकबोटे हे प्रमुख पाहुणे म्हणून उपस्थित होते. कार्यक्रमाची सुरुवात ग्रीन कॉरीडॉरचे प्रात्यक्षिकने झाली. पोलीस विभागाच्या पूर्वपरवानगीने रुग्णवाहिकेचा मार्गक्रम बालगंधर्व चौक, घोले रोड, तुकाराम पादुका चौक, ज्ञानेश्वर पादुका चौक ते प्रोग्रेसिव्ह एज्युकेशन सोसायटीचे सभागृह असा होता. कोणत्याही अडथळ्याशिवाय आणि विलंब न करता एखादा अवयव गरज असलेल्या रुग्णापर्यंत कसा पोहोचेल हे प्रात्यक्षिकाद्वारे दाखविण्यात आले. त्यानंतर कार्यक्रमाचे उद्घाटन करण्यात आले. कार्यक्रमावेळी हृदयदान वरील प्रेझेंटेशन दाखविण्यात आले. रुबी हॉल क्लिनिकचे मुख्य कार्यकारी अधिकारी डॉ. बेहराम खोदाईजी यांनी उद्घाटनपर भाषण केले. त्यानंतर सर्व मान्यवरांचे स्वागत आणि सत्कार करण्यात आला. डॉ. पुरवेझ के. ग्रांट यांनी रुग्णालय आणि वैद्यकीय विज्ञान क्षेत्रातील तांत्रिक प्रगती माहिती दिली. रुबी हॉल क्लिनिकने हृदय प्रत्यारोपणाच्या प्रक्रियेवर एक लघुपट सादर केला आणि समूह संचालक-वैद्यकीय सेवा डॉ. प्रसाद मुगलीकर यांनी प्रत्यारोपण कार्यक्रमाचा आढावा दिला. डॉ. कपिल झिरपे यांनी अवयवदानाचे महत्त्व आणि अवयवदानाची वाढती गरज याबद्दल सांगितले. डॉ. जगदीश हिरेमठ यांनी हृदय प्रत्यारोपणाच्या वैद्यकीय पैलूंबद्दल, ते कसे केले जाते याबद्दल विविध गोष्टींबद्दल माहिती दिली. डॉ. अशिष खनिजो यांनी अवयवदानाच्या प्रक्रियांबद्दल, ज्या प्रकरणांवर त्यांनी शस्त्रक्रिया केले आहे आणि हृदय प्रत्यारोपण क्षेत्रातील प्रगतीबद्दल माहिती दिली. या सर्वांनी अवयवदानाची गरज यावर भर दिला आणि जनतेला या व्यवस्थेत सहभागी होण्याचे आवाहन केले. या कार्यक्रमात अवयवदानाविषयीचे विविध गैरसमज दूर करण्यात आले. अवयवदानामुळे दुसऱ्या व्यक्तीला जीवनदान मिळते. जगणे सुकर होते. कार्यक्रमास उपस्थित असेलेले प्रा. डॉ. गजानन र. एकबोटे यांनी संस्थेच्या प्रगतीविषयी माहिती दिली. जेव्हा संस्थेच्या महाविद्यालयांमध्ये एखादा नवीन अभ्यासक्रम सुरु केला जातो तेव्हा त्या नवीन अभ्यासक्रमाची अंमलबजावणी कशाप्रकारे केली जाते याविषयी त्यांनी सांगितले. विविध क्षेत्रात प्रगती करण्यासाठी समाज आणि संस्थांच्या पुरोगामी आणि आधुनिक दृष्टिकोनावर त्यांनी भर दिला. अवयवदानाचे महत्त्व पटवून देत अवयव प्रत्यारोपण क्षेत्रात रुबी हॉल क्लिनिकच्या कार्याचे कौतुक केले तसेच भविष्यात रुबी हॉल क्लिनिकने असे कार्यक्रम अधिकाधिक घेण्याचे आवाहन केले. त्यानंतर त्यांनी रुबी हॉल क्लिनिकच्या संपूर्ण हृदय प्रत्यारोपण टीमचा सत्कार केला. त्यांनी रूबी हॉल क्लिनिकच्या टीमसोबतचा आपला हृदयस्पर्शी अनुभव सांगितला. डॉ. सरांनी अवयवदानाच्या महत्त्वावर भर दिला आणि काळाची गरज लक्षात घेता जनतेला अवयवदानाच्या उदात्त कार्यात सहभागी होण्याचे आवाहन केले. “रुबी हॉल क्लिनिक हे वैद्यकीय क्षेत्रातील उत्तम तंत्रज्ञानाचा वापर करणारे भारतातील अग्रगण्य रुग्णालय असून या रुग्णालयात उत्तम सोई-सुविधा, तज्ञ डॉक्टर व उत्तम कर्मचारी वर्ग रुग्णसेवेसाठी उपलब्ध आहे”, असे गौरवोद्गार डॉ. सरांनी काढले. प्रोग्रेसिव्ह एज्युकेशन सोसायटीचे मॉडर्न कॉलेज ऑफ फिजिओथेरपी या महाविद्यालयातील विद्यार्थ्यांनी ‘हृदय प्रत्यारोपण’ या विषयावर नाटक सादर केले, ज्यात त्यांनी अवयवदानाची जाणीव नसणे आणि त्याची आवश्यकता दर्शविली. हृदय प्रत्यारोपणामध्ये फिजिओथेरपीच्या भूमिकेच्या महत्त्वावरही विद्यार्थ्यांनी भर दिला. हृदय प्रत्यारोपणातून वाचलेल्यांनी आपले हृदयस्पर्शी अनुभव सांगितले आणि त्यांचा सत्कार करण्यात आला. वैद्यकीय टीम, नर्सिंग फॅकल्टी, विविध वैद्यकीय संस्थांचे वैद्यकीय कर्मचारी, आय.एम.ए. सदस्य तसेच प्रोग्रेसिव्ह एज्युकेशन सोसायटीचे कार्यवाह प्रा. शामकांत देशमुख, सहकार्यवाह प्रा. डॉ. सौ. ज्योत्स्ना एकबोटे, उपकार्यवाह प्रा. डॉ. निवेदिता एकबोटे तसेच नियामक मंडळाचे सर्व सन्माननीय सदस्य, शिक्षक, प्राध्यापक, शिक्षकेतर कर्मचारी, मॉडर्न कॉलेज ऑफ फिजिओथेरपी या महाविद्यालयाचे विद्यार्थी हे उपस्थित होते. सदर कार्यक्रमाचे सूत्रसंचालन डॉ. सबरीना बोकील आणि डॉ. गायत्री पंडित यांनी केले. तसेच डॉ. नताली नंदा ग्रांट यांनी उपस्थितांचे आभार मानले. आयोजक पथकात डॉ. सुचेता गोलहर यांच्या मार्गदर्शनाखाली श्री. बॉबी जॉन, डॉ. प्रसाद मुगलीकर, डॉ. गायत्री पंडित आणि मिस पूनम चौहान आणि मॉडर्न कॉलेज ऑफ फिजिओथेरपीच्या संपूर्ण टीमचा समावेश होता. या कार्यक्रमास सुमारे १५०० श्रोते उपस्थित होते.
