RTE Admission 2026 – शिक्षण हक्क कायद्यांतर्गत २५ टक्के राखीव जागांसाठीची विद्यार्थ्यांची निवड यादी प्राथमिक शिक्षण संचालनालयाने अखेर जाहीर केली आहे. ६ एप्रिल रोजी पार पडलेल्या ऑनलाइन सोडतीनंतर आज अधिकृतरीत्या आकडेवारी प्रसिद्ध करण्यात आली असून, राज्यातील १ लाख ५ हजार ८११ बालकांची पहिल्या फेरीत निवड झाली आहे. शिक्षण संचालक शरद गोसावी यांनी दिलेल्या माहितीनुसार, यावर्षी ८ हजार ७०१ शाळांमधील १ लाख १४ हजार ८२६ रिक्त जागांसाठी तब्बल २ लाख ८९ हजार ३८५ अर्ज आले होते. त्यापैकी १०,५,२२९ विद्यार्थी सर्वसाधारण संवर्गातून, तर ५८२ बालके दिव्यांग संवर्गातून पात्र ठरली आहेत. भविष्यातील रिक्त जागांचा विचार करून ८६ हजार ३४ विद्यार्थ्यांची प्रतीक्षा यादीही तयार ठेवण्यात आली आहे. निवड झालेल्या बालकांच्या पालकांना आजपासून (दि. १०) नोंदणीकृत मोबाइलवर एसएमएस पाठविण्यात येत आहेत. मात्र, केवळ संदेशावर अवलंबून न राहता पालकांनी आरटीई पोर्टलवर जाऊन स्वतःच्या अर्जाची स्थिती तपासावी, असे आवाहन प्रशासनाने केले आहे. निवड झालेल्या विद्यार्थ्यांना ११ एप्रिल ते २० एप्रिल २०२६ या कालावधीत संबंधित पडताळणी समितीकडे कागदपत्रे तपासून आपला प्रवेश निश्चित करावा लागणार आहे. पडताळणी समितीने मान्यता दिल्यानंतरच ऑनलाइन प्रवेश प्रत प्राप्त होईल, ज्याद्वारे शाळांमध्ये प्रवेश घेता येईल. मुदतीनंतर येणाऱ्या पालकांना संधी मिळणार नसल्याने पालकांनी त्वरित कागदपत्रांची पूर्तता करणे आवश्यक आहे, अशी माहिती शिक्षण विभागाने दिली आहे.
