Road Accident – जुन्या पुणे-मुंबई हायवेवर लोणावळा येथील झालावाडी परिसरात ३ जून रोजी पहाटे साडे चार वाजताच्‍या सुमारास एक भीषण अपघात घडला. भरधाव वेगातील अज्ञात टाटा टेम्पोने रस्त्याच्या कडेला थांबलेल्या टाटा एस टेम्पोला आणि चालकाला जोरदार धडक दिली. या अपघातात एकाचा जागीच मृत्यू झाला असून दोन जण गंभीर जखमी झाले आहेत. राजू धर्मा माने (वय ३६, रा. कांदिवली, मुंबई) यांनी या प्रकरणी लोणावळा शहर पोलीस ठाण्यात फिर्याद दिली आहे.

पोलीस माहितीनुसार, फिर्यादींचे भाऊ अंबादास धर्मा माने (वय ३८) हे टाटा एस टेम्पो (क्र. MH 47 BL 7814) घेऊन मुंबईच्या दिशेने जात होते. लोणावळ्यातील एचपी पेट्रोल पंपाजवळ, जैन सॅनिटोरियमसमोर त्यांनी लघुशंकेसाठी गाडी थांबवली. त्यानंतर गाडीतील प्रवासी व्यवस्थित बसले आहेत का, हे पाहण्यासाठी अंबादास गाडीच्या मागे गेले.

त्याच वेळी पुण्याकडून आलेल्या अज्ञात टाटा टेम्पो (क्र. MH 04 KU 9628) चालकाने निष्काळजीपणे गाडी चालवत थांबलेल्या टेम्पोला आणि अंबादास यांना जोराची धडक दिली. या भीषण अपघातात अंबादास माने यांचा मृत्यू झाला, तर त्यांचे वडील धर्मा मुकिंदा माने व इतर प्रवासी गंभीर जखमी झाले. अपघात करून चालक वाहनासह फरार झाला आहे. ​या प्रकरणी लोणावळा पोलिसांनी गुन्हा दाखल केला असून पुढील तपास पोलीस हवालदार चाकणे करत आहेत.