Road Accident – मराठा आरक्षणाच्या लढ्यात सक्रिय सहभाग घेणारे आणि समाजकारणात कायम आघाडीवर असलेले सरडेवाडी (ता. इंदापूर) येथील रामचंद्र शंकर जमदाडे यांचे बीडजवळ झालेल्या भीषण अपघातात दुर्दैवी निधन झाले. त्यांच्या निधनामुळे सरडेवाडीसह संपूर्ण परिसरात हळहळ व्यक्त होत असून मराठा समाजाने एक निष्ठावंत कार्यकर्ता गमावल्याची भावना व्यक्त होत आहे.

रामचंद्र जमदाडे हे मराठा आरक्षण आंदोलनाचे नेते मनोज जरांगे पाटील यांचे खंदे समर्थक म्हणून ओळखले जात होते. मराठा समाजाच्या विविध प्रश्नांवर आयोजित करण्यात येणार्‍या आंदोलने, मोर्चे, बैठका आणि जनजागृती कार्यक्रमांमध्ये त्यांचा सक्रिय सहभाग असायचा. समाजाच्या हक्कांसाठी लढणारा आणि युवकांना संघटित करणारा कार्यकर्ता म्हणून त्यांनी आपली वेगळी ओळख निर्माण केली होती. सामाजिक क्षेत्राबरोबरच राजकीय क्षेत्रातही त्यांचे कार्य उल्लेखनीय होते.

ते माजी मंत्री हर्षवर्धन पाटील यांचे निष्ठावंत कार्यकर्ते होते. गावातील विविध सामाजिक उपक्रम, जनसंपर्क मोहिमा आणि सार्वजनिक कार्यक्रमांमध्ये ते नेहमी पुढाकार घेत असत. त्यामुळे त्यांचा मित्रपरिवार आणि जनसंपर्क मोठा होता. मनोज जरांगे पाटील यांच्या आंदोलनात सहभागी होण्यासाठी ते सहकार्‍यांसमवेत बीडकडे रवाना झाले होते. मात्र, बीडजवळ त्यांच्या वाहनाला झालेल्या भीषण अपघातात त्यांचा जागीच मृत्यू झाला. या घटनेने त्यांच्या कुटुंबीयांवर, मित्रपरिवारावर आणि समाजबांधवांवर दुःखाचा डोंगर कोसळला आहे.

या अपघातात भाटनिमगाव (ता. इंदापूर) येथील संतोष पांडुरंग माने आणि सरडेवाडी येथील बिपिन नारायण मोरे हे दोघे गंभीर जखमी झाले असून त्यांच्यावर बीड येथील लोटस हॉस्पिटलमध्ये उपचार सुरू आहेत. रामचंद्र जमदाडे यांच्या अकाली निधनामुळे समाजासाठी झटणारा, मित्रांच्या मदतीला धावून जाणारा आणि आपल्या विचारांशी प्रामाणिक राहणारा कार्यकर्ता हरपल्याची भावना सर्व स्तरांतून व्यक्त होत आहे. त्यांच्या कार्याची आणि समाजाप्रती असलेल्या निष्ठेची आठवण गावकर्‍यांच्या आणि सहकार्‍यांच्या मनात कायम राहणार आहे.