प्रभात वृत्तसेवा
सातारा – मराठा समाजाला आरक्षण मिळवून देण्यासाठी मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे हे सकारात्मक आहेत. देवेंद्र फडणवीस हेच गरजू मराठा समाजाला आरक्षण मिळवून देतील, असा विश्वास सार्वजनिक बांधकाम मंत्री शिवेंद्रसिंहराजे भोसले यांनी व्यक्त केला.मंत्री शिवेंद्रसिंहराजे यांनी शनिवारी सातार्‍यात पत्रकारांची संवाद साधला.

ते म्हणाले, मराठा समाजाला आरक्षण मिळूच शकणार नाही, असे काही लोक म्हणत होते. त्यावेळी मुख्यमंत्री देवेंद्र फडणवीस यांनी मराठा समाजाला आरक्षण मिळवून दिले होते. मात्र, फडणवीस यांचे सरकार पायउतार झाल्यानंतर, काही लोक मराठा आरक्षणाविरोधात न्यायालयात गेले होते. न्यायालयाने हे आरक्षण रद्द केल्याने, मराठा समाजाला आरक्षणाचा लाभ मिळू शकला नव्हता.

मराठा समाजातील गरजू लोकांना आरक्षण मिळावे, यासाठी मनोज जरांगे पाटील यांचे आंदोलन सुरू आहे. न्याय्य हक्कांसाठी लढणे, हा प्रत्येकाचा अधिकार आहे. मराठा समाजाला आरक्षण मिळाले पाहिजे; परंतु ते घटनेने आणि कायद्याने टिकायला हवे. जरांगे पाटील यांच्या मागणीला आमचा सगळ्यांचा पाठिंबा आहे. आम्ही त्यांना भेटलो होतो. समाजाच्या गरजेचा हा मुद्दा आहे.

सरकारशी चर्चा केल्याशिवाय हा मुद्दा सुटणार नाही. चर्चा करून, आरक्षण आपल्या पदरात कसे पडेल, हे मराठा समाजाने पाहावे. मीदेखील मराठा समाजातील आहे. समाजातील अनेक घटकांची स्थिती अत्यंत वाईट आहे. गरजू मराठ्यांना आरक्षण आवश्यक आहे, असे या समाजातील एक व्यक्ती म्हणून माझे स्पष्ट मत आहे. महायुतीचे सरकार मराठा आरक्षणाठी आग्रही आहे. मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे हेच मराठा समाजाला आरक्षण मिळवून देतील.