पाटणा – यावर्षी ऑक्टोबर-नोव्हेंबरमध्ये होणाऱ्या विधानसभा निवडणुकीपूर्वी बिहारमध्ये पोस्टर वॉर तीव्र होत आहे. ईदच्या निमित्ताने राष्ट्रीय जनता दलाने पाटण्यामध्ये विविध ठिकाणी पोस्टर्स लावून सौगत-ए-मोदी किटवर टीका केली आहे.

तेजस्वी यादव यांच्यासोबत पंतप्रधान मोदींचा फोटोही पोस्टरमध्ये लावण्यात आला आहे. मुस्लिमांना ईदीची भिक्षा नको आहे, त्यांना संवैधानिक अधिकार हवे आहेत, वक्फ विधेयक रद्द करा. आम्ही वक्फ दुरुस्ती विधेयक नाकारतो असे या पोस्टरवर लिहिले आहे.

हे पोस्टर्स आरजेडी नेते मेहताब आलम यांनी लावले आहेत. ज्यामध्ये पंतप्रधान मोदींच्या चित्रावर लिहिले आहे की आम्हाला मोदींची भेट नको आहे. ईदनंतर, संसदेच्या अर्थसंकल्पीय अधिवेशनाच्या दुसऱ्या टप्प्यात, केंद्र सरकार हे विधेयक सादर करून मंजूर करण्याचा प्रयत्न करू शकते.

ईदनिमित्त भाजप मुस्लिमांना मोदी किटची भेट देत आहे. या किटमध्ये अन्नपदार्थ आणि कपडे आहेत. याची काही गरज नाही, हा संदेशही पोस्टरद्वारे देण्यात आला आहे.

या वर्षी बिहारमध्ये निवडणुका आहेत. अशा परिस्थितीत विरोधी पक्ष याला एक मोठा निवडणूक मुद्दा बनवण्यात व्यस्त आहेत. मुस्लिमांमध्ये वक्फ दुरूस्ती विधेयकाबद्दल भीती आहे, त्यांची मालमत्ता हडप केली जाईल असे राष्ट्रीय जनता दलाचे म्हणणे आहे तर केंद्र सरकार म्हणते की हे विधेयक वक्फ मालमत्तेचा गैरवापर रोखेल, विधेयक वक्फ मालमत्तेच्या संरक्षण आणि व्यवस्थापनाशी संबंधित आहे.

यापूर्वी राजद अध्यक्ष लालू प्रसाद यादव आणि तेजस्वी यादव यांनीही पाटण्यातील गरदानीबाग येथे वक्फ दुरुस्ती विधेयकाविरुद्धच्या निषेधात भाग घेतला होता. यावेळी मुस्लिम संघटनांना पाठिंबा देताना तेजस्वी यादव म्हणाले की, धार्मिक भेदभावावर आधारित कोणत्याही कायद्याला लोकशाहीत स्थान नाही.

आपले मुस्लिम बंधू आणि भगिनी एकटे नाहीत; आम्ही त्यांच्यासोबत खांद्याला खांदा लावून उभे आहोत आणि अन्याय, अत्याचार आणि द्वेषाविरुद्धच्या त्यांच्या लढाईत त्यांच्या पुढेही आहोत. ही आपली संयुक्त लढाई आहे. आम्ही न्याय, समानता आणि प्रतिष्ठा पुन्हा स्थापित करण्यासाठी वचनबद्ध आहोत.

तेजस्वी म्हणाले की, आम्ही एकतेवर विश्वास ठेवतो, विभाजनावर नाही. जेव्हा आपण एकत्र उभे राहतो तेव्हा न्यायाचा विजय होतो. आम्ही मागे हटणार नाही, आम्ही गप्प बसणार नाही आणि अन्यायाचा कायदा बनू देणार नाही. आपण लढू, आपण उभे राहू आणि आपण जिंकू असा विश्‍वास त्यांनी व्यक्त केला.