Ghod Dam :  शिरुर आणि श्रीगोंदा तालुक्यातील शेतीला वरदान ठरलेल्या चिंचणी (ता. शिरुर) येथील घोड धरणामध्ये 82 टक्के पाणीसाठा झाला आहे. धरणाच्या उजव्या कालव्यातुन 150 क्युसेक आणि डाव्या कालव्यातून 300 क्युसेकने पाण्याचा विसर्ग सुरु असल्याची माहिती शाखा अभियंता वैभव काळे यांनी दिली.

चिंचणी(ता.शिरुर) येथील घोड धरणाची एकुण पाणी साठवण क्षमता ७६३८ दशलक्ष घनफुट आहे. तर उपयुक्त पाणीसाठा ५४६७ दशलक्ष घनफुट आणि मृत पाणीसाठा २१७२ दशलक्ष घनफुट आहे. धरणाला दोन कालवे असुन उजव्या कालव्याची लांबी ३० किमी आणि डाव्या कालव्याची लांबी ८४ किमी आहे.

घोड धरणातून रांजणगाव औद्योगिक वसाहत, घोडगंगा सहकारी साखर कारखाना, श्रीगोंदा सहकारी साखर कारखाना, तसेच शिरुर, काष्टी व श्रीगोंदा येथील अनेक गावासाठी पाणी पुरवठा करण्यासाठी जलवाहिनीद्वारे पाणी नेले आहे.

शिरुर तालुक्यासह अहमदनगर जिल्ह्यातील श्रीगोंदा आणि कर्जत या तालुक्यातील मिळून सुमारे २० हजार ५०० हेक्टर क्षेत्र या धरणामुळे सिंचनाखाली आले असून शेतीसाठी या धरणाच्या पाण्याचा वापर केला जातो.

या धरणाच्या खालच्या बाजुस शिरसगांव काटा, धनगरवाडी, इनामगांव, नलगेमळा, गांधले मळा, तांदळी खोरे, तांदळी संगम येथे कोल्हापूर पद्धतीचे बंधारे असून घोड धरणाच्या पाण्यामुळे या बंधाऱ्याना मोठ्या प्रमाणात फायदा होतो. सध्या घोड धरण 82 टक्के भरल्याने शेतकऱ्यांकडूनही आनंद व्यक्त केला जात आहे.

हेही वाचा:

Tiger Shroff and Shanaya Kapoor New Movie: टायगर श्रॉफ-शनाया कपूर पहिल्यांदाच मोठ्या पडद्यावर; अहमद खान यांनी केला चित्रपटाचा खुलासा