Reels Star Attack – डेक्कन जिमखाना परिसरातील फ्लाईंग जिप्सी हाॅटेलसमोर शनिवारी पहाटे तरुणाच्या डोक्यात शस्त्राने वार करुन त्याला मारहाण केली. या प्रकरणी दोन तरुणींसह साथीदाराला अटक झाली आहे. तसेच त्यांच्याबरोबरच्या सात-आठजणांविरुद्ध गुन्हा दाखल झाला आहे. फिर्यादी आणि आरोपीचा ग्रुप रिल्स स्टार म्हणून काम करतात अथर्व प्रमोद जगताप ( १९, रा. ऑरा सोसायटी, शिवसृष्टीजवळ, आंबेगाव) असे जखमीचे नाव आहे.

या प्रकरणी माधवी कुंभार (रा. काळेपडळ, हडपसर), स्नेहल सोनके (रा. पिंपळे गुरव), शार्दुल ओव्हाळ (रा. हडपसर) यांना अटक झाली. जगताप याच्या डेक्कन पोलीस ठाण्यातील फिर्यादीनुसार आरोपी तरुणी, फिर्यादी अथर्व जगताप हे ओळखीचे आहेत. सातारा येथे त्यांची काही महिन्यांपूर्वी भांडणे झाली होती. शनिवारी (१५ ऑगस्ट) पहाटे सव्वातीनला अथर्व हा फ्लाईंग जिप्सी हाॅटेलमधून बाहेर पडत असताना टोळक्याने अडवले.

तू तरुणींना काय बोलला. आमच्याबरोबर चल, तुला दाखवितो, अशी धमकी दिली. अथर्व घाबरून हाॅटेलमध्ये पळाला. त्या वेळी आरोपी तरुणी आणि साथीदारांनी त्याला शिवीगाळ केली. याला मारा, जिवंत सोडू नका, असे धमकावत शस्त्राने वार केला. हाॅटेलमधील खुर्ची फेकून मारली, तसेच लाथाबुक्क्यांनी मारहाण केली. विशेष म्हणजे, फ्लाईंग जिप्सी कॅफे रात्री उशीरापर्यंत उघडे असल्याने त्यावर कारवाई करताना पोलीस अधिकाऱ्याने कॉफी कप फेकून दिले होते.

यामुळे डेक्कन पोलीस ठाण्याचे पोलीस उपनिरीक्षक संदीप कदम यांना २९ जून रोजी निलंबित केले होते. मात्र, घटनेची सत्यता तपासल्यानंतर त्यांचे निलंबन मागे घेतले. आता पुन्हा त्याच कॅफेमध्ये पहाटेपर्यंत सुरू असलेल्या पार्टीदरम्यान कोयत्याने हल्ला झाल्याने डेक्कन परिसरातील कायदा-सुव्यवस्थेचा प्रश्न पुन्हा ऐरणीवर आला आहे. पहाटे चार वाजेपर्यंत कॅफे सुरू ठेवण्यास परवानगी कशी मिळते? तसेच एवढ्या मोठ्या टोळक्याकडून कोयता आणला जाताना सुरक्षा यंत्रणा काय करत होती? असा प्रश्‍न उपस्थित होत आहे.