Satara: काँग्रेस प्रदेश समितीच्या विचार विभागाच्या सातारा जिल्हाध्यक्षपदी रवींद्र भारती यांची नियुक्ती करण्यात आली आहे. महाराष्ट्र प्रदेश काँग्रेस समितीकडून रवींद्र भारती यांच्या नावाची शिफारस राष्ट्रीय अध्यक्ष कॅप्टन प्रवीण डावर यांच्याकडे करण्यात आली होती. कॅप्टन डावर यांचे मान्यतेनुसार ही नियुक्ती करण्यात आली आहे, त्याचबरोबर सातारा जिल्हा काँग्रेस कमिटीच्या सरचिटणीसपदाची जबाबदारी रवींद्र भारती यांच्यावर सोपवण्यात आली आहे.

महाराष्ट्र प्रदेश काँग्रेस समितीच्यावतीने १७ सप्टेंबर २०२६ रोजी त्यांना नियुक्तीपत्र देण्यात आले. काँग्रेस विचार विभागाच्या माध्यमातून विचारवंतांचे संघटन, पक्षाची विचारधारा, संविधानिक मूल्ये, सामाजिक प्रश्न तसेच विविध समकालीन विषयांवर जनजागृती व प्रबोधन करण्याची जबाबदारी त्यांच्यावर राहणार आहे. तसेच जिल्हा काँग्रेसचे सरचिटणीस म्हणून पक्षाच्या संघटनात्मक कामकाजातही ते सक्रिय भूमिका बजावणार आहेत.

रवींद्र भारती यांचा काँग्रेस पक्षातील कामाचा प्रदीर्घ अनुभव आहे. त्यांनी सातारा शहर युवक काँग्रेस अध्यक्ष म्हणून सात वर्षे, तर सातारा शहर काँग्रेस अध्यक्ष म्हणून आठ वर्षे जबाबदारी सांभाळली आहे. या काळात त्यांनी पक्षाच्या संघटनात्मक बांधणीसाठी विविध उपक्रम आणि कार्यक्रमांच्या माध्यमातून काम केले.

सातारा नगरपालिकेत दहा वर्षे नगरसेवक म्हणून त्यांनी काम केले असून, यापैकी चार वर्षे विविध समित्यांचे सभापती म्हणूनही त्यांनी जबाबदारी सांभाळली आहे. त्यामुळे पक्ष संघटना, स्थानिक स्वराज्य संस्था आणि प्रशासनाच्या कामकाजाचा त्यांना प्रदीर्घ अनुभव आहे.

राजकीय क्षेत्राबरोबरच रविंद्र भारती सामाजिक, आर्थिक, साहित्यिक, सांस्कृतिक, क्रीडा, आरोग्य आणि पर्यावरण क्षेत्रातही सक्रिय आहेत. या नियुक्तीबद्दल काँग्रेस प्रदेशाध्यक्ष हर्षवर्धन सपकाळ, माजी मुख्यमंत्री पृथ्वीराज चव्हाण विधानपरिषद गटनेते सतेज उर्फ बंटी पाटील, आमदार डॉ. विश्वजित कदम, खासदार विशाल पाटील,युवक काँग्रेसचे प्रदेशाध्यक्ष शिवराज मोरे, प्रदेश सरचिटणीस राजेंद्र शेलार, सातारा जिल्हाध्यक्ष नामदेव पाटील, महिला काँग्रेसच्या जिल्हाध्यक्षा सौ. सुषमाताई घोरपडे, युवक काँग्रेसचे जिल्हाध्यक्ष राहुल पवार, माजी जिल्हाध्यक्ष रणजितसिंह देशमुख, ज्येष्ठ नेते बाबासाहेब कदम, ज्येष्ठ नेत्या सौ. रजनीताई पवार, सातारा तालुकाध्यक्ष अजितराव कदम, शहर अध्यक्षा सौ. धनश्री महाडिक, कांग्रेसचे पदाधिकारी, कार्यकर्ते तसेच विविध क्षेत्रातील मान्यवरांकडून रविंद्र भारती यांचे अभिनंदन करण्यात येत आहे.