Satara: शहरात दोन दिवस चालणार्‍या गणेश विसर्जन मिरवणुकीमध्ये वाहतूक सुरळीत ठेवण्यासाठी पोलिसांनी प्रमुख मार्गांवर वाहतुकीत तात्पुरते बदल केले आहेत. गुरुवार, दि. 24 रोजी सकाळी 10 वाजल्यापासून शनिवार, दि. 26 रोजी सकाळी 7 वाजेपर्यंत हे बदल लागू राहणार आहेत. याबाबत पोलीस अधीक्षक निखील पिंगळे यांनी मुंबई पोलीस अधिनियम 1951 मधील कलम 34 अन्वये अधिसूचना जारी केली आहे.

राजपथावरील कमानी हौद, देवी चौक, मारवाडी चौक ते मोती चौक आणि कमानी हौद ते शेटे चौक या मार्गांवर वाहनांना प्रवेश बंद राहणार आहे. शेटे चौक-शनिवार चौक-मोती चौक, मोती चौक-महावितरण कार्यालय-समर्थ टॉकीज-राधिका टॉकीज चौक-ऐक्य प्रेस कॉर्नर-बुधवार नाका-विसर्जन कृत्रिम तलाव-आंदेकर चौक, करंजे पेठ या विसर्जन मार्गावरही वाहतूक बंद ठेवण्यात येणार आहे.
प्रतापगंज पेठेतील काटदरे मसाले दुकान ते डीसीसी बँक-मोती तळे आणि शाहूपुरी पोलीस ठाणे ते बुधवार नाका या मार्गांवरही वाहनांना प्रवेश बंद राहणार आहे.

समर्थ मंदिर ते चांदणी चौक (राजवाडा) आणि बोगदा-समर्थ मंदिर ते शाहू चौक या मार्गांवर हलकी चारचाकी व अवजड वाहने आणि एसटी बसेसच्या वाहतुकीवर निर्बंध असतील. सज्जनगड व कासकडे जाणारी वाहने गोडोली नाका, शिवराज पेट्रोल पंप, खिंडवाडी, शेंद्रे-सोनगाव फाटा, बोगदा या मार्गाने वळवण्यात येणार आहेत. मोळाचा ओढा येथून शहरात येणारी वाहने महानुभाव मठ, करंजे, भूविकास बँक चौकमार्गे पुढे जातील.

विसर्जन मिरवणूक मार्गावर सर्व वाहनांना पार्किंग बंद राहणार आहे. विसर्जन मिरवणूक पाहण्यासाठी येणार्‍या नागरिकांनी तालीम संघ मैदान, कोटेश्वर मैदान किंवा उपलब्ध पर्यायी जागेत वाहने पार्क करावीत. रुग्णवाहिका, पोलीस व अग्निशमन दलाची वाहने या निर्बंधातून वगळण्यात आली आहेत. नागरिकांनी वाहतूक बदलांची नोंद घेऊन, सहकार्य करावे. विसर्जन मिरवणूक मार्गावर वाहने उभी करू नयेत, असे आवाहन पोलिसांनी केले आहे.

• विसर्जन मार्गावर ‘नो पार्किंग’
• राजवाडा ते मोती चौक
• देवी चौक-कमानी हौद-शेटे चौक
• शनिवार चौक-मोती चौक-राधिका चौक
• बुधवार नाका ते विसर्जन कृत्रिम तलाव