Satara: जिल्हा परिषदेच्या पर्यावरणपूरक गणेशोत्सवाची मंगळवारी भक्तिमय आणि उत्साहपूर्ण वातावरणात सांगता झाली. जिल्हा परिषद प्रांगणात विधिवत प्रतिष्ठापना करण्यात आलेल्या श्री गणेशमूर्तीचे परिसरात पाण्याच्या कृत्रिम तलावात विसर्जन करण्यात आले. या विसर्जन मिरवणुकीत जिल्हा परिषद अध्यक्षा डॉ. सौ. प्रिया शिंदे यांनी ढोल वादन करत सहभाग घेतला.

कृषी, पशुसंवर्धन सभापती सौ. लता कर्णे, मुख्य कार्यकारी अधिकारी याशनी नागराजन, अतिरिक्त मुख्य कार्यकारी अधिकारी राहुल गावडे, उपमुख्य कार्यकारी अधिकारी निलेश घुले व राहुल देसाई,मुख्य लेखा व वित्त अधिकारी राहुल कदम, विविध विभागांचे अधिकारी व कर्मचारी यावेळी उपस्थित होते. पर्यावरणाचे संरक्षण, जलप्रदूषणाला आळा आणि पारंपरिक संस्कृतीचे जतन हा संदेश देत जिल्हा परिषदेने कृत्रिम तलावामध्ये गणेशमूर्तीचे विसर्जन केले.

जिल्हा परिषदेच्या प्रांगणामध्ये कृत्रिम तलावामध्ये श्रींच्या मूर्तीचे विसर्जन डॉ. प्रिया शिंदे, याशनी नागराजन, सौ. लता कर्णे व अधिकाऱ्यांच्या हस्ते करण्यात आले. पर्यावरणपूरक गणेशोत्सव केवळ संकल्पना न राहता ती आपल्या आचरणाचा भाग झाली पाहिजे. परंपरा आणि पर्यावरण यांचा समतोल साधत गणेशोत्सव साजरा करता येतो, हे या उपक्रमातून अधोरेखित झाल्याची प्रतिक्रिया याशनी नागराजन यांनी व्यक्त केली.

 डीजेला फाटा देत ढोल-ताशांचा गजर

विसर्जन मिरवणुकीमध्ये डीजेच्या कर्णकर्कश आवाजाला फाटा देत पारंपरिक ढोल- ताशांच्या गजरात श्री गणेशमूर्तीची मिरवणूक काढण्यात आली. विशेष म्हणजे डॉ. प्रिया शिंदे यांनी ढोल वाजवत मिरवणुकीत उत्स्फूर्त सहभाग घेतला. त्यांच्या या सहभागामुळे अधिकारी, कर्मचारी आणि उपस्थितांमध्ये मोठा उत्साह निर्माण झाला. ढोल- ताशांचा निनाद, ‘गणपती बाप्पा मोरया’, ‘पुढच्या वर्षी लवकर या’चा जयघोष यामुळे संपूर्ण परिसर भक्तिमय आणि आनंदमय वातावरणाने भारून गेला होता.

गणेशोत्सव उत्सवासोबत पर्यावरण संवर्धनाची जबाबदारीही आपलीच आहे. जिल्हा परिषदेने कृत्रिम तलावामध्ये गणेशमूर्तीचे विसर्जन करून पर्यावरण रक्षणाचा संदेश दिला आहे. पारंपरिक ढोल- ताशांच्या गजरात बाप्पाला निरोप देताना स्वतः ढोल वाजवण्याचा आनंदही वेगळाच आहे. परंपरा जपत पर्यावरणाचे संरक्षण करण्याचा हा उपक्रम समाजासाठी निश्चितच प्रेरणादायी ठरेल.