Ravi Shankar Prasad : माजी केंद्रीय कायदा मंत्री आणि भाजपचे ज्येष्ठ नेते रविशंकर प्रसाद (Ravi Shankar Prasad) यांची मंगळवारी लोकसभेच्या विशेषाधिकार समितीच्या अध्यक्षपदी नियुक्ती करण्यात आली आहे. १८ व्या लोकसभेची स्थापना झाल्यानंतर या समितीची रचना होण्याची ही पहिलीच वेळ आहे. लोकसभा अध्यक्ष ओम बिर्ला यांनी रविशंकर प्रसाद (Ravi Shankar Prasad) यांच्यासह इतर १४ खासदारांची या समितीचे सदस्य म्हणून नियुक्ती केली आहे. या समितीमध्ये भाजपचे जगदंबिका पाल, त्रिवेंद्र सिंग रावत, आणि जगदीश शेट्टर यांच्यासह विरोधी पक्षातील मनीष तिवारी (काँग्रेस), कल्याण बॅनर्जी (टीएमसी), टी.आर. बालू (द्रमुक), आणि धर्मेंद्र यादव (सपा) यांचा समावेश आहे. महाराष्ट्रातून शिवसेनेचे (शिंदे गट) श्रीरंग अप्पा बारणे आणि शिवसेनेचे (ठाकरे गट) अरविंद सावंत यांचीही निवड करण्यात आली आहे. समितीचे सदस्य असलेले काँग्रेस खासदार माणिकम टागोर यांनी सांगितले की, बेशिस्त वर्तनामुळे त्यांना संपूर्ण अधिवेशनासाठी निलंबित करण्यात आले असल्याने ते सध्या समितीच्या बैठकीला उपस्थित राहू शकणार नाहीत. सभागृहाचे किंवा सदस्यांच्या विशेषाधिकारांचे उल्लंघन झाल्याच्या प्रकरणांची चौकशी करणे, हे या समितीचे मुख्य कार्य आहे. समिती तथ्यांची तपासणी करून आपला अहवाल आणि शिफारसी सभापतींकडे सादर करते. ९ मार्चपासून सुरू होणाऱ्या अर्थसंकल्पीय अधिवेशनाच्या दुसऱ्या टप्प्यात ही समिती सक्रीय होईल.
