Rang Panchami 2026 – रंगांच्या उधळणीचा सण अवघ्या काही दिवसांवर येऊन ठेपला आहे. पिंपरी-चिंचवड शहरातील प्रमुख बाजारपेठांमध्ये रंगोत्सवाची लगबग वाढली आहे. रविवारच्या सुट्टीची संधी साधून नागरिकांनी खरेदीसाठी मोठी गर्दी केल्याने शहरातील भोसरी, चिंचवड, आकुर्डी, निगडी, पिंपरी बाजार परिसर गजबजून गेले होते. व्यापाऱ्यांच्या मते, गेल्या दोन वर्षांच्या तुलनेत यंदा उत्साहात लक्षणीय वाढ झाली असून बाजारात मोठ्या आर्थिक उलाढालीची चिन्हे दिसू लागली आहेत. यंदा पारंपरिक गुलाल आणि रंगांसोबतच आधुनिक उपकरणांची चलती दिसत आहे. मेड-इन-इंडिया पिचकाऱ्यांची मोठ्या प्रमाणात आवक झाली असून विविध आकार, रंग आणि क्षमतेतील पिचकाऱ्या ग्राहकांचे लक्ष वेधून घेत आहेत. विशेषतः इलेक्ट्रिक वॉटर गन, बॅटरीवर चालणाऱ्या पिचकाऱ्या आणि नव्याने आलेल्या ‘शॉवर पिचकारी’ला मुलांकडून विशेष पसंती मिळत आहे. शॉवर पिचकाऱ्यांची किंमत साधारण २०० ते २५० रुपयांच्या दरम्यान आहे. लहान मुलांसाठी कार्टून पात्रांच्या आकर्षक पिचकाऱ्यांनी दुकाने सजली आहेत. डोरेमॉन, स्पायडरमॅन, छोटा भीम, अव्हेंजर्स आदी पात्रांच्या डिझाईन्सना मोठी मागणी आहे. पिचकाऱ्यांची किंमत ५० रुपयांपासून ते तब्बल दीड हजार रुपयांपर्यंत आहे. एकाच वेळी २७ फुगे भरणारे ‘मॅजिक बलून’चे बंडल यंदा नव्या आकर्षणाचा विषय ठरत आहे. ठोक बाजारात हे बंडल २० ते ४० रुपयांत उपलब्ध असून किरकोळ विक्रेत्यांकडूनही त्याची मोठ्या प्रमाणावर विक्री होत आहे. रंगांच्या बाबतीतही ग्राहकांकडे विविध पर्याय उपलब्ध आहेत. पारंपरिक रंगांबरोबरच ‘मॅजिक कलर’, ‘कलर स्मोक’ आणि विविध प्रकारचे पाण्याचे फुगे बाजारात दाखल झाले आहेत. होळीच्या उत्साहात भर घालण्यासाठी साधू जटा, विविध प्रकारचे विग, फॅन्सी चष्मे, टोपी आणि सेलिब्रिटी हेअरस्टाईल अॅक्सेसरीज यांचीही मागणी वाढली आहे. आरोग्याबाबतची जागरूकता वाढल्याने यंदा रासायनिक रंगांपेक्षा हर्बल गुलालाला ग्राहकांकडून अधिक प्रतिसाद मिळत आहे. नैसर्गिक फुलांपासून तयार केलेले आणि त्वचेला इजा न करणारे गुलाल ४० रुपयांपासून ते ५०० रुपयांच्या आकर्षक पॅकिंगमध्ये उपलब्ध आहे. व्यापाऱ्यांच्या मते, गुणवत्तेला प्राधान्य देत ग्राहक खरेदी करत असून पुढील आठवड्यात उलाढालीत वाढ होण्याची शक्यता आहे. यंदा इलेक्ट्रिक गन आणि शॉवर पिचकारीला अपेक्षेपेक्षा जास्त मागणी आहे. हर्बल रंगांची विक्रीही वाढली आहे, अशी माहिती शहरातील पिचकारी व रंग व्यवसायिकांनी दिली. एकूणच, रंगोत्सवाच्या पार्श्वभूमीवर पिंपरी-चिंचवडची बाजारपेठ रंग, गुलाल आणि पिचकाऱ्यांनी फुलून गेली असून शहरात होळीचा उत्साह शिगेला पोहोचला आहे.
