नवी दिल्ली : राजस्थानमध्ये राज्यसभा निवडणुकीवरून राजकारण चांगलेच तापले आहे. दरम्यान, अपक्ष उमेदवार सुभाष चंद्रा यांनी आपल्या विजयाचा दावा केला असून, आठ आमदार क्रॉस व्होट करतील आणि चार आमदार त्यांना पाठिंबा देत आहेत. काँग्रेसचे आमदारही क्रॉस व्होट करणार असल्याचे ते म्हणाले.  सुभाष चंद्रांच्या या दाव्यावर काँग्रेस नेते सचिन पायलट यांनी आपली प्रतिक्रिया दिली आहे.  त्यांचा दावा हा हास्यास्पद असल्याचे सांगून सुभाष चंद्रांचे विधान पूर्णपणे फेटाळून लावले आहे.

सुभाष चंद्रांच्या दाव्यावर सचिन पायलट म्हणाले,”आम्हाला 110% आत्मविश्वास आहे, आमचे तीनही उमेदवार विजयी होतील. आम्हांला पाहिजे तेवढा आकडा जिंकण्यासाठी सध्या जास्त आमदारांचा पाठिंबा मिळाला आहे. आम्हाला अपक्ष आणि प्रादेशिक पक्षाच्या आमदारांचा पाठिंबा मिळाला आहे. सर्व आमदारांनी आम्हाला पाठिंबा दिला आहे. अशा परिस्थितीत क्रॉस व्होटिंग करून निवडणूक जिंकता येते, असा गैरसमज कोणीही बाळगू नये. प्रत्यक्षात भाजपकडे तेवढे आमदार नसल्यामुळेच ते गोंधळ घालत असल्याचा आरोप पायलट यांनी यावेळी केला.

पुढे बोलताना पायलट म्हणाले,”निवडणुकीच्या तीन दिवस आधी येऊन त्यांना बोलावे लागत आहे, ही टीव्ही मालिका नाही, ही एक गंभीर मुद्दा आहे. आमच्यासोबत असलेले आमदार आमचे तिन्ही उमेदवार विजयी करतील. मात्र भाजपने त्यांना उमेदवारी दिली नाही, ते स्वत: समोर आले आहेत. आता भाजपशी चर्चा होणार नाही, असे त्यांना वाटले असेल. लोकशाहीत संख्या निर्णायक असते. आम्हाला 123 आमदारांची गरज आहे आणि त्यापेक्षा जास्त आमदार आहेत. सर्व आमदार आम्हाला मतदान करतील हे उघड आहे. हेच आमदार 2018 पासून त्यांच्यासोबत आहेत. त्यांनी अनेकदा पाठिंबा दिला आहे. यामुळे सुभाषचंद्रांची नक्कीच निराशा होईल, असेही त्यांनी म्हटले आहे.