Rajmata Jijau Bus – महाराष्ट्र राज्य मार्ग परिवहन महामंडळाच्या प्रत्येक आगारात राजमाता जिजाऊ बस दाखल झाल्या आहेत. या बसमध्ये महिलांच्या सुरक्षितेच्या दृष्टीकोनातून चार सीसीटीव्ही कॅमेरे बसवण्यात आले आहेत. सातारा आगारात 58 बस दाखल झाल्या आहेत. प्रवासादरम्यान महिला, शालेय मुली, युवती यांच्यासोबत अनेक गैरप्रकार होत असतात.

अशा गैरप्रकारांना आळा घालण्यासाठी राज्य मार्ग परिवहन महामंडळाने जिजाऊ बसमध्ये तीन आणि मागील बाजूस एक असे चार सीसीटीव्ही कॅमेरे बसवले आहेत. प्रवासी चढण्यापासून ते उतरेपर्यंत सर्व हालचालींची नोंद या कॅमेर्‍यात होत आहे. मागील कॅमेर्‍यामुळे बस मागे घेताना तसेच अपघात टाळण्यासाठी ही चालकाला मदत मिळणार आहे. या बसची आसनक्षमता इतर एसटी बसपेक्षा अधिक असून 55 प्रवासी,

चालक आणि वाहक अशा एकूण 57 जण या बसमधून प्रवास करु शकतात. एसटीच्या ताफ्यात सध्या साधी बस, ई-बस, शिवनेरी, शिवशाही, निमआराम आणि राजमाता जिजाऊ बसचा समावेश आहे. महिला व ज्येष्ठ नागरिकांना दिल्या जाणार्‍या सवलतींमुळे एसटीकडे प्रवाशांचा ओढा कायम असून, आधुनिक सुविधांमुळे सेवेची गुणवत्ता वाढत आहे. राज्यात आतापर्यंत सातारा विभागाला सर्वाधिक 58 राजमाता जिजाऊ बस देण्यात आल्या आहेत.