Jailer 2 box office : दाक्षिणात्य चित्रपटसृष्टीचे सुपरस्टार रजनीकांत यांची जादू पुन्हा एकदा बॉक्स ऑफिसवर पाहायला मिळत आहे. त्यांच्या बहुप्रतीक्षित ‘जेलर २’ या चित्रपटाने प्रदर्शनानंतर अवघ्या पाच दिवसांत जगभरातील कमाईचा मोठा टप्पा गाठला आहे. अ‍ॅक्शन, जबरदस्त स्वॅग आणि रजनीकांत यांची दमदार स्क्रीन प्रेझेन्स यामुळे चित्रपटाची सर्वत्र चर्चा रंगली आहे.

१५ ऑक्टोबर रोजी चित्रपटगृहांत दाखल झालेल्या या सिनेमाने पहिल्या दिवसापासूनच कमाईचा वेग पकडला आणि आता तो ५०० कोटींच्या क्लबमध्ये प्रवेश करण्याच्या अगदी जवळ पोहोचला आहे. विशेष म्हणजे, सुरुवातीच्या पाच दिवसांतील कमाईने चित्रपटाने वर्षातील सर्वाधिक कमाई करणाऱ्या चित्रपटांच्या शर्यतीतही आपलं स्थान भक्कम केलं आहे.

पाच दिवसांत किती कमाई केली?

‘जेलर २’ने प्रदर्शनाच्या पाचव्या दिवशी भारतात सर्व भाषांमध्ये मिळून अंदाजे ४२.३५ कोटी रुपयांचं नेट कलेक्शन केलं. यासह चित्रपटाची भारतातील एकूण नेट कमाई २४२.२५ कोटी रुपयांवर पोहोचली आहे. भारतातील ग्रॉस कलेक्शन २८३.७५ कोटी रुपये झालं आहे.

जगभरातील कमाईचा विचार केला, तर चित्रपटाने पाच दिवसांत तब्बल ४७७.७५ कोटी रुपयांचा ग्रॉस गल्ला जमवला आहे. यामध्ये परदेशातील १९४ कोटी रुपयांच्या ग्रॉस कमाईचा समावेश आहे. म्हणजेच, जागतिक बॉक्स ऑफिसवर ५०० कोटींचा टप्पा गाठण्यासाठी चित्रपटाला आता फार मोठं अंतर पार करावं लागणार नाही.

‘टायगर’ मुथुवेल पांडियनचा पुन्हा दरारा…

नेल्सन दिलीपकुमार यांच्या दिग्दर्शनाखाली तयार झालेल्या ‘जेलर २’मध्ये रजनीकांत पुन्हा एकदा मुथुवेल पांडियन अर्थात ‘टायगर’च्या भूमिकेत दिसत आहेत. पहिल्या भागातील या व्यक्तिरेखेला प्रेक्षकांनी भरभरून प्रेम दिलं होतं. त्याच व्यक्तिरेखेचा पुढचा प्रवास, अ‍ॅक्शन सीन्स आणि रजनीकांत यांचा खास अंदाज यामुळे सिक्वेलबद्दल प्रेक्षकांमध्ये मोठी उत्सुकता होती.

सन पिक्चर्सच्या बॅनरखाली कलानिधी मारन यांनी या चित्रपटाची निर्मिती केली आहे. चित्रपटात रजनीकांत यांच्यासोबत रम्या कृष्णन, एस. जे. सूर्या, विद्या बालन, मोहनलाल, जॅकी श्रॉफ, मिथुन चक्रवर्ती आणि अन्य कलाकार महत्त्वाच्या भूमिकांमध्ये आहेत. अनिरुद्ध रविचंदर यांचं संगीतही चित्रपटाच्या आकर्षणाचा महत्त्वाचा भाग आहे.