मुंबई : मुंबईतील बेस्ट कर्मचारी सहकारी पतपेढीच्या निवडणुकीत शिवसेना आणि मनसे यांच्या उत्कर्ष पॅनेलला दारुण पराभवाचा सामना करावा लागला. 21 जागांसाठी झालेल्या या निवडणुकीत ठाकरे बंधूंच्या पॅनेलला एकही जागा जिंकता आली नाही. शशांक राव यांच्या पॅनेलने 14 जागांसह दणदणीत विजय मिळवला, तर महायुतीच्या सहकार समृद्धी पॅनेलने 7 जागा जिंकल्या. या निकालानंतर ठाकरे बंधूंच्या युतीच्या रणनीतीवर प्रश्नचिन्ह उपस्थित झाले असून, आगामी मुंबई महापालिका (BMC) निवडणुकीसाठी हा पराभव धोक्याची घंटा मानला जात आहे.

दरम्यान, बेस्ट निवडणुकीतील पराभवावर मनसेप्रमुख राज ठाकरे यांनी आज माध्यमांशी बोलताना सावध प्रतिक्रिया दिली. ते म्हणाले, “त्या छोट्या निवडणुका आहेत. या लहान गोष्टी आहेत. कुठल्या निवडणुकांबद्दल तुम्ही बोलता? मला त्याच्याबद्दल काहीच माहिती नाही… त्या स्थानिक निवडणुका आहेत… तुम्हाला रोज आग लावायला हवं.” राज ठाकरे यांनी या पराभवाचे गांभीर्य कमी करत त्याला स्थानिक आणि किरकोळ स्वरूपाचे ठरवले. त्यांच्या या प्रतिक्रियेवरून त्यांनी हा पराभव फारसे मनावर घेतले नसल्याचे दिसते.

“ठाकरे ब्रँड कोमात, स्वदेशी देवाभाऊ जोमात”

निकालानंतर भाजपने ठाकरे बंधूंवर जोरदार हल्ला चढवला. दादर येथील सेनाभवन परिसरात भाजपने “ठाकरे ब्रँड कोमात, स्वदेशी देवाभाऊ जोमात” अशा आशयाचे फलक लावून ठाकरे बंधूंना डिवचले. भाजप नेते आणि आमदार प्रसाद लाड यांच्या नेतृत्वाखालील सहकार समृद्धी पॅनेलला 7 जागा मिळाल्या, तर शशांक राव यांच्या स्वतंत्र पॅनेलने 14 जागा जिंकत बाजी मारली. भाजप नेत्यांनी या निकालाला “ठाकरे ब्रँडचा अंत” असा टोमणा मारला आहे.

शशांक राव यांचा दणदणीत विजय

शशांक राव यांच्या पॅनेलने 14 जागा जिंकत बेस्ट पतपेढीवर वर्चस्व प्रस्थापित केले. शशांक राव यांनी निकालानंतर सांगितले, “दोन भाऊ एकत्र आले हा प्रश्न नाही, जर तुम्ही कामगारांसाठी काम केलंत, तर एकटे असाल तरी निवडून येता.” त्यांनी ठाकरे बंधूंच्या गटावर कामगारांच्या हिताकडे दुर्लक्ष केल्याचा आरोप केला, ज्यामुळे त्यांना हा विजय मिळाल्याचे सांगितले. BEST Election Result 2025 |