Raigad : रायगड जिल्ह्यातील दिवेआगर समुद्रकिनारी गुरुवारी (१ ऑक्टोबर) मोठी दुर्घटना घडली. पुणे जिल्ह्यातील आळंदी येथील एका खासगी अकॅडमीचे आठ विद्यार्थी समुद्रात बुडून मृत्युमुखी पडले. मृत सर्व विद्यार्थ्यांचे वय १६ वर्षे असून ते आळंदीचे रहिवासी असल्याची माहिती पोलिसांनी दिली आहे. या दुर्घटनेमुळे आळंदीत शोककळा पसरली आहे.

आळंदी येथील ‘विनर्स अकॅडमी फॉर ११ वी आणि १२ वी’मधील २५ मुले, १७ मुली आणि सहा शिक्षक असे एकूण ४८ जण पर्यटनासाठी दिघी सागरी परिसरातील दिवेआगर समुद्रकिनारी आले होते. त्यावेळी आठ विद्यार्थी समुद्रात पोहण्यासाठी गेले असता पाण्यात बुडाले. स्थानिक नागरिकांच्या मदतीने त्यांना समुद्रातून बाहेर काढण्यात आले. त्यानंतर त्यांना रुग्णालयात नेण्यात आले. मात्र, डॉक्टरांनी त्यांना मृत घोषित केले.

या दुर्घटनेची माहिती मिळताच उपमुख्यमंत्री सुनेत्रा पवार यांनी रायगडच्या जिल्हाधिकाऱ्यांशी दूरध्वनीवरून संपर्क साधला. बचावकार्य आणि मदतकार्याबाबत प्रशासनाला तातडीने आवश्यक सूचना देण्यात आल्या. तसेच परिस्थितीवर लक्ष ठेवण्याचे निर्देशही त्यांनी दिले. मृत विद्यार्थ्यांच्या कुटुंबीयांप्रती त्यांनी दुःख व्यक्त केले.

राष्ट्रवादी काँग्रेसचे प्रदेशाध्यक्ष सुनील तटकरे यांनीही या दुर्घटनेबद्दल शोक व्यक्त केला. दिवेआगर समुद्रकिनारा सुरक्षित करण्यासाठी सातत्याने प्रयत्न सुरू असल्याचे त्यांनी सांगितले. भविष्यात अशा दुर्घटना टाळण्यासाठी आवश्यक उपाययोजना करण्याची गरज असल्याचेही त्यांनी नमूद केले. सरकारकडून मृत विद्यार्थ्यांच्या कुटुंबीयांना मदत मिळेल, अशी अपेक्षाही त्यांनी व्यक्त केली.

मृत विद्यार्थ्यांची नावे –

पोलिसांकडून पुढील कार्यवाही सुरू असून मृत विद्यार्थ्यांची नावे समोर आली आहेत.

तन्मय दत्तात्रय वहीले
सुमित भरत अहिरे
प्रणव रामदास बनसोडे
कैवल्य सतीश वासनकर
राजवीर युवराज वहीले
यश किरण वानखेडे
सोहम तुकाराम भांडवलकर
कौस्तुभ संदीप दौंड

दिवेआगर समुद्रकिनारी घडलेल्या या दुर्घटनेने आळंदी परिसरावर शोककळा पसरली आहे. आठही विद्यार्थ्यांच्या कुटुंबीयांवर दुःखाचा डोंगर कोसळला असून, या घटनेमुळे परिसरात हळहळ व्यक्त केली जात आहे.